Директори Агентии хоҷагии ҷангал Абдуҷаббор Юсуфзода: Татбиқи Барномаи рушди соҳаи ҷангал дар Тоҷикистон дар шароити тағйирёбии иқлим муфид аст

Июль 27, 2022 16:20

ДУШАНБЕ, 27.07.2022. /АМИТ «Ховар»/. Соли равон бо қарори Ҳукумати Ҷумҳурии Тоҷикистон «Барномаи рушди соҳаи ҷангал барои солҳои 2022-2026» ва нақшаи чорабиниҳо оид ба амалисозии барномаи мазкур тасдиқ гардид. Нақшаи чорабиниҳо аз 15 бобу 52 банд иборат буда, самтҳои асосии рушди соҳаи ҷангалро дар панҷ соли оянда дар бар мегирад. Дар ин бора Директори Агентии хоҷагии ҷангали назди Ҳукумати  Ҷумҳурии Тоҷикистон Абдуҷаббор Юсуфзода ба хабарнигорон иттилоъ дод.

Бо амалӣ гардидани барномаи  мазкур бисёр мушкилоти соҳа ҳалли худро ёфта, ҷангал дар пешрафти мамлакат, таъмини бехатарии озуқаворӣ, кам кардани таъсири гармшавии саросарӣ, захира ва кам кардани  газҳои гулхонаӣ, сарсабзу  хуррамгардонӣ ва ободонии кишвар, инчунин дарёфти ҷойҳои нави кор мусоидат мекунад.

Тавре АМИТ «Ховар» қаблан иттилоъ дода буд, мақсади асосии «Барномаи рушди соҳаи ҷангал барои солҳои 2022-2026»  нигоҳдории гуногунии биологӣ, барқароркунӣ, зиёд намудани масоҳату  маҳсулоти ҷангал, беҳтар намудани сифат ва миқдори хизматрасониҳои экосистемавии пешниҳодшаванда дар шароити тағйирёбии иқлим, мусоидат ба рушди иқтисодиёт,  баланд бардоштани дараҷаи некуаҳволии сокинон  бо роҳи ҷалби онҳо ба пешбурди хоҷагии ҷангал, таъмини бозори дохилӣ  бо маҳсулоти ҷангал ва содироти он ба хориҷи кишвар мебошад.


Тазаккур дода шуд, ки яке аз мақсадҳои дигари барномаи мазкур ин зиёд намудани масоҳат, нигоҳдории гуногунии биологӣ, нигоҳдорӣ ва барқароркунии ҷангалҳо дар шароити тағйирёбии иқлим мебошад.

«Ҷангалзор барои ҳифзи муҳити зист ва аз чангу ғубор эмин нигоҳ доштани табиат саҳми калон дорад. Аз ин хотир агентӣ ба парвариши намудҳои гуногуни дарахту буттаҳои  маҳаллӣ, ки ба шароити ҷумҳурӣ хос буда, дар раванди тағйирёбии иқлим  хеле муҳим мебошанд, диққати ҷиддӣ медиҳад. Бо ин мақсад ҳоло дар хоҷагиҳои ниҳолпарварӣ ва ниҳолхонаҳои хурди назди хоҷагиҳои ҷангал кӯчату парвариши  ниҳолҳои дарахтони сояафкан, ороишӣ, ҳамешасабз ва мевадиҳанда ба роҳ монда шудааст»,- гуфт Директори агентӣ.

Ҳамчунин иттилоъ дода шуд, ки барои рушду равнақи соҳа аз ҷониби Ҳукумати Ҷумҳурии Тоҷикистон дар давраи Истиқлолияти давлатӣ дар мамлакат ду маротиба Кодекси ҷангали Ҷумҳурии Тоҷикистон- яке соли 1993 ва дигаре соли 2011 таҳия ва қабул гардида буд. Дар асоси он якчанд санадҳои меъёрию ҳуқуқӣ, ки танзими соҳаи ҷангалро дар бар мегиранд, қабул карда шуданд.

Зарангези ЛАТИФ,
АМИТ «Ховар»

АКС: АМИТ «Ховар»

Июль 27, 2022 16:20

Хабарҳои дигари ин бахш

Тағйирот ба Қонун «Дар бораи минтақаҳои озоди иқтисодӣ». Ҳадафи ниҳоӣ афзоиш додани содирот ва коҳиш додани воридот аст
Ҳайати Агентии назорати давлатии молиявӣ ва мубориза бо коррупсияи Тоҷикистон дар конференсияи минтақавӣ дар Тошканд иштирок намуд
Тоҷикистон ва Чин барои сармоягузорӣ ба кони ангишти «Шӯроб» созишнома ба имзо расониданд
Тоҷикистон ва Озарбойҷон ҳамкории афзалиятнокро тақвият медиҳанд
Директори минтақавии ICAO зимни нахустин сафар ба Тоҷикистон бо фаъолияти «Тоҷикаэронавигатсия» шинос шуд
Иқтидори иқтисодии Тоҷикистон ва Озарбойҷон имкон медиҳад гардиши мол афзоиш ёбад
Дар Боку тақвияти ҳамкории Тоҷикистон ва Озарбойҷон дар соҳаи саноат баррасӣ гардид
Байни ширкатҳои Тоҷикистон ва Озарбойҷон 15 санади ҳамкорӣ ба имзо расид
Дар шаҳри Боку Анҷумани соҳибкорони Тоҷикистон ва Озарбойҷон доир гардид
Байни «Саноатсодиротбонк» ва Фонди рушди соҳибкории Озарбойҷон Ёддошти тафоҳум оид ба ҳамдигарфаҳмӣ ба имзо расид
Дар доираи Форуми тиҷоратӣ имконият ва фазои сармоягузории Тоҷикистон ба доираҳои соҳибкории Ҷопон муаррифӣ шуд
Дар доираи «Kazanforum 2024» байни Вазорати нақлиёти Тоҷикистон ва Вазорати нақлиёт ва хоҷагии роҳҳои Тотористон Ёддошти тафоҳум ба имзо расид