Раиси Маҷлиси намояндагон Маҳмадтоир Зокирзода бо сокинону фаъолони ноҳияи Шуғнон мулоқот намуд

ДУШАНБЕ, 29.07.2022 /АМИТ «Ховар»/. 28 июл дар маркази ноҳияи Шуғнон вохӯрии Раиси Маҷлиси намояндагони Маҷлиси Олии Ҷумҳурии Тоҷикистон Маҳмадтоир Зокирзода ва Раиси ВМКБ Алишер Мирзонабот бо фаъолони ноҳия баргузор гардид, хабар медиҳад АМИТ «Ховар» бо истинод ба Мақомоти иҷроияи ҳокимияти давлатии ноҳияи Шуғнон.

Мақсади вохӯрӣ шиносоӣ бо вазъи соҳаҳои хоҷагии халқи ноҳия ва ҷараёни иҷрои дастуру супоришҳои Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон буд.

Дар вохӯрӣ ҳамзамон раисони шаҳри Хоруғ ва ноҳияи Мурғоб иштирок намуданд ва доир ба афзун намудани майдони кишти маҳсулоти кишоварзӣ, ҷараёни корҳои сохтмонӣ дар иншооти ҷашнӣ, омодагиҳо ба зимистонгузаронӣ ва дигар масъалаҳои муҳими рӯз суҳбати пурмуҳтаво сурат гирифт.

Дар интиҳо чанд нафар сокинон аз ҷумлаи  фаъолону собиқадорони меҳнат, инчунин Раиси шаҳри Хоруғ Ризо Назарзода, Раиси ноҳияи Мурғоб Ҳусния Раҷабзода, Раиси ноҳияи Шуғнон Ҷумъа Ҷумъазода омодагиашонро ба иҷрои дастуру супоришҳои Пешвои миллат ҷиҳати  вусъат бахшидани корҳои бунёдкорию созандагӣ баён намуданд.

АКС: Мақомоти иҷроияи ҳокимияти давлатии ноҳияи Шуғнон