Сироҷидин Икромӣ: «Сатҳу сифати хизматрасониро ба мизоҷ беш аз пеш баланд бардоред»

Июль 9, 2022 10:01

ДУШАНБЕ, 09.07.2022 /АМИТ «Ховар»/. Масъалаи баланд бардоштани сатҳи хизматрасонии кормандони марказҳои хизматрасониҳои бонкӣ, риояи қатъии қоидаҳои одоби муошират бо мизоҷон ва эҳсоси баланди масъулиятшиносии кормандони «Амонатбонк» дар мулоқоти Раиси Раёсат бонки давлатии амонатгузории Ҷумҳурии Тоҷикистон «Амонатбонк» Сироҷидин Икромӣ бо кормандони филиалҳо ва марказҳои хизматрасонии бонкии Бонки мазкур дар шаҳру навоҳии тобеи ҷумҳурӣ баррасӣ гардид. Дар ин бора АМИТ «Ховар» бо истинод ба Бонки давлатии амонатгузории Ҷумҳурии Тоҷикистон «Амонатбонк» иттилоъ медиҳад.

Дар вохӯрӣ инчунин ҳайати роҳбарикунандаи филиалҳо, мутахассисон, кормандони марказҳои хизматрасонии бонкӣ ва роҳбарони воҳидҳои сохтории дастгоҳи марказии «Амонатбонк» иштирок намуданд.

Дар вохӯрӣ сардори идораи танзим ва назорати марказҳои хизматрасонии бонкӣ Ҷ. Ҳақназарзода оид ба бурду бохти фаъолияти Марказҳои хизматрасонии бонкӣ дар соли равон ва дар муқоиса бо ҳамин давраи соли гузашта бо таҳлилҳову пешниҳодҳо гузориш дод. Инчунин маълумот аз натиҷаи нишондиҳандаҳои марказҳои хизматрасониҳои бонкӣ дар монитор тавассути рўнамо пешкаши иштирокчиён гардид.

Зикр шуд, ки дар навоҳии тобеи марказ 10 филиал бо теъдоди 107 адад марказҳои хизматрасонии бонкӣ, аз ҷумла 2 хазинаи шабонарузӣ ва 2 -адад бегоҳирӯзӣ ба аҳолии навоҳии тобеи марказ хизматрасонии гуногуни бонкӣ мерасонанд.


Дар марказҳои хизматрасониҳои бонкӣ амалиётҳои гуногуни бонкӣ, аз қабили интиқоли маблағҳои шахсони воқеӣ бидуни кушодани суратҳисоб, амалиётҳои хазинавӣ, қабули маблағҳои коммуналӣ, андозҳо, ҷаримаҳо, пардохти маблағҳои нафақа ва кӯмакпулиҳо, хизматрасонии машваратӣ оид ба ҳама гуна амалиётҳои бонкӣ ва дигар намуди пардохтҳо аз аҳолӣ гузаронида мешавад.

Ҳамзамон аз ҷониби Раиси Раёсати «Амонатбонк» Сироҷиддин Икромӣ ҷиҳати зиёд намудани пайвастнамоӣ бо СМС-паёмак, истифодаи барномаи Амонат-мобайл, интернет-банкинг ва рушди ҳисоббаробаркуниҳои ғайринақдӣ супоришҳои мушаххас дода шуд.

Барои саҳми босазо гузоштан дар рушди фаъолияти соҳа ва тақвияти мавқеи бонк дар низоми бонкии кишвар беҳтарин марказҳои хизматрасонии бонкии филиалҳои «Амонатбонк» дар шаҳру навоҳии тобеи ҷумҳурӣ, аз ҷумла маркази хизматрасонии бонкии /МХБ/ №683 филиали №10-и «Амонатбонк» дар шаҳри Ҳисор, МХБ-и №693-и филиали №14-и «Амонатбонк» дар шаҳри Ваҳдат, МХБ №685-и филиали №13-и «Амонатбонк» дар ноҳияи Рӯдакӣ бо «Ифтихорнома» қадрдонӣ гардиданд.

Дар анҷом Раиси Раёсати Бонки давлатии амонатгузории Ҷумҳурии Тоҷикистон «Амонатбонк» Сироҷиддин Икромӣ бори дигар ҷиҳати боз ҳам беҳтар намудани сифати хизматрасонӣ ва таъмини хизматрасониҳои саривақтӣ ба мизоҷон ба роҳбарони филиалҳо дастуру супоришҳои мушаххас дод.

АКС: Бонки давлатии амонатгузории Ҷумҳурии Тоҷикистон «Амонатбонк»

Июль 9, 2022 10:01

Хабарҳои дигари ин бахш

Эмомалӣ Раҳмон: «Дар Вилояти Мухтори Кӯҳистони Бадахшон амалисозии 9 барномаи рушди иҷтимоиву иқтисодӣ идома дорад»
Байни вилоятҳои Хатлони Тоҷикистон ва Ленингради Русия Созишномаи ҳамкорӣ ба имзо расид
Раҳмон Исломиддин дар ҷаласаи навбатии Шурои байнидавлатӣ оид ба стандартизатсия, метрология ва сертификатсияи давлатҳои аъзои ИДМ иштирок намуд
Дар Турсунзода Фестивали саводнокии молиявӣ баргузор шуд
ҚУРБИ АСЪОР: дар Тоҷикистон 1 рубли русӣ аз 0.1263 то 0.1235 сомонӣ муқаррар шудааст
Татбиқи тарҳи «CASA-1000» намунаи ҳамкории энергетики минтақавӣ мебошад
Ҷаласаи сеюми Комиссияи байниҳукуматии Тоҷикистону Ҷопон баргузор гардид
Байни «Амонатбонк» ва Федератсияи футболи Тоҷикистон шартномаи ҳамкорӣ ба имзо расид
Дар доираи ҳамкории Тоҷикистон бо Фонди байналмилалии рушди кишоварзӣ академияи бонкӣ таъсис дода мешавад
«Саноатсодиротбонк» ба соҳибкорони Бадахшон беш аз 130 миллион сомонӣ қарзҳои имтиёзнок пешниҳод намудааст
ҚУРБИ АСЪОР: дар Тоҷикистон 1 евро аз 11.4976 то 11.3200 сомонӣ муқаррар шудааст
Харитаи роҳи Ҳадафи 7-уми Рушди Устувор барои Тоҷикистон расман оғоз гардид