Ҳайати Тоҷикистон дар Форуми 10-ум оид ба содагардонии савдо дар минтақаи Осиё ва Уқёнуси Ором дар Сингапур иштирок намуд

Август 30, 2022 16:45

ДУШАНБЕ, 30.08.2022 /АМИТ «Ховар»/. Ҳайати Ҷумҳурии Тоҷикистон таҳти роҳбарии муовини Вазири рушди иқтисод ва савдои ҷумҳурӣ Абдураҳмон Абдураҳмонзода дар Форуми 10-ум оид ба содагардонии савдо дар минтақаи Осиё ва Уқёнуси Ором, ки 29-30 август дар Сингапур доир гардид, иштирок намуд. Дар ин бора АМИТ «Ховар» бо истинод ба Вазорати рушди иқтисод ва савдои ҷумҳурӣ иттилоъ медиҳад.

Дар форум дастовардҳои кишварҳои минтақа вобаста ба масъалаҳои марбут ба содагардонии расмиёти савдо, рақамикунонии соҳаи савдо, бартараф намудани пайомадҳои манфии пандемияи COVID-19, инчунин иштироки самараноки корхонаҳои хурду миёна ва кишварҳои камтараққикарда дар низоми савдои бисёрҷониба муаррифӣ карда шуданд.

А. Абдураҳмонзода дар панели сатҳи баланд сухан гуфта, зикр намуд, ки бо мақсади иҷрои дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти содагардонии расмиёти савдо якчанд корҳои назаррас амалӣ гардидаанд.

Аз ҷумла, Кумитаи ҳамоҳангсоз оид ба содагардонии расмиёти савдо таъсис дода шуда, Портали савдои Тоҷикистон ва низоми «Равзанаи ягонаи барасмиятдарории амалиёти содиротӣ, воридотӣ ва транзитӣ дар Ҷумҳурии Тоҷикистон» расман мавриди истифода қарор доранд, инчунин якчанд ҳуҷҷатҳои стратегии марбут ба савдо, аз ҷумла Барномаи миёнамуҳлати рушди иқтисоди рақамӣ барои солҳои 2021-2025 ва Барномаи давлатии рушди содироти Ҷумҳурии Тоҷикистон барои солҳои 2021-2025 қабул гардидаанд, ки ҷиҳати дар сатҳи зарурӣ татбиқ намудани ҳадафҳои лоиҳаҳои минтақавӣ ва тақвияти ҳамгироии савдои минтақавӣ мусоидат менамоянд.


Муовини Вазири рушди иқтисод ва савдои Тоҷикистон ҳамчун роҳбари гурӯҳи кории Барномаи махсуси СММ барои иқтисодиёти Осиёи Марказӣ (СПЕКА) оид ба савдо дар робита ба дастовардҳои кишварҳои СПЕКА ва лоиҳаҳои татбиқшавандаи минтақавӣ оид ба содагардонии расмиёти савдо ва дурнамои тақвияти робитаҳои тиҷоратӣ маълумоти муфассал пешниҳод намуд. Дар робита ба ин барои расидан ба ҳадафу вазифаҳои санадҳои қайдгардида ва лоиҳаҳои татбиқшаванда ҷиҳати таҳкими робитаҳои тиҷоратию иқтисодӣ бо кишварҳои минтақа ҷалби сармояи хориҷӣ ва расонидани кумакҳои техникӣ аз ҷониби шарикони рушд зарур арзёбӣ карда шуд.

Дар форум аз ҷониби коршиносони созмонҳои байналмилалӣ таъсиси Кумитаи ҳамоҳангсоз оид ба содагардонии расмиёти савдои Ҷумҳурии Тоҷикистон ва фаъол гардонидан Портали савдои Тоҷикистон, инчунин «Равзанаи ягонаи барасмиятдарории амалиёти содиротӣ, воридотӣ ва транзитӣ» ҳамчун ислоҳоти назаррас миёни кишварҳои минтақа арзёбӣ карда шуд.

Ҳамзамон дар ҳошияи Форум дар Сингапур Абдураҳмон Абдураҳмонзода бо намояндаи Бонки Осиёии Рушд /БОР/ Алберт Парк мулоқот намуда, масъалаҳои марбут ба тақвияти ҳамкории тиҷоратию иқтисодии Тоҷикистон ва Бонки Осиёии Рушдро баррасӣ намуданд. Вобаста ба сатҳи ҷории ҳамкории мавҷуда миёни тарафҳо, лоиҳаҳои татбиқшаванда аз ҷониби БОР, барномаву ҳуҷҷатҳои стратегии Тоҷикистон ва ислоҳоти амалигардида дар самти савдо, аз ҷумла Портали савдои Тоҷикистон, низоми «Равзанаи ягонаи барасмиятдарории амалиёти содиротӣ, воридотӣ ва транзитӣ дар Ҷумҳурии Тоҷикистон», «Барномаи миёнамуҳлати рушди иқтисоди рақамӣ барои солҳои 2021-2025» ва «Барномаи давлатии рушди содироти Ҷумҳурии Тоҷикистон барои солҳои 2021-2025» маълумот пешниҳод гардида, иштироки БОР дар татбиқи онҳо зарур арзёбӣ гардид.

Намояндаи БОР аз дастовардҳои ҷониби Тоҷикистон истиқбол намуда, омодагии худро ҷиҳати тақвияти бештари ҳамкорӣ иброз намуд.

АКС: Вазорати рушди иқтисод ва савдои ҶТ

Август 30, 2022 16:45

Хабарҳои дигари ин бахш

Соли 2022 дар вилояти Суғд беш аз 2,2 ҳазор километр роҳ таъмир карда шуд
«Саноатсодиротбонк» ва Актиф Бонки Туркия масъалаҳои ҳамкории дуҷонибаро баррасӣ намуданд
Бонки миллии Тоҷикистон ва Дафтари Швейтсария оид ба ҳамкории иқтисодӣ самтҳои афзалиятнокро баррасӣ карданд
НИШАСТИ МАТБУОТӢ. Дар ноҳияи Тоҷикобод соли гузашта 51 лоиҳа мавриди амал қарор гирифт
Раёсати кишоварзии ноҳияи Мурғоб имсол ба соҳаҳои қутоспарварӣ, моҳидорию боғпарварӣ афзалият медиҳад
Дар Душанбе татбиқи лоиҳаҳои давлатии сармоягузорӣ баррасӣ шуд
Хадамоти зиддиинҳисорӣ: Соли 2022 зимни санҷишҳо ба маблағи 6,1 млн сомонӣ қонунвайронкунии зиддиинҳисорӣ ошкор карда шуд
НИШАСТИ МАТБУОТӢ. Соли 2022 аз ҷониби Cуди Олии иқтисодии Ҷумҳурии Тоҷикистон 3 568 парвандаи иқтисодӣ баррасӣ карда шуд
Тоҷикистон ва Русия фонди сармоягузорӣ таъсис медиҳанд
«Амонатбонк» ба муштариён беш аз 10 миллион сомонӣ қарзҳои ипотекӣ пешниҳод намудааст
Палатаи ҳисоби Тоҷикистон ва Идораи аудитори генералӣ ва назорати Ҳиндустон Ёддошти тафоҳум ба имзо расониданд
Дар хоҷагии ҷангали «Шӯрообод»-и ноҳияи Шамсиддини Шоҳин ниҳолхонаи нав ташкил карда шуд