Дар деҳаи Ашти поёни ноҳияи Ашт бунгоҳи тиббӣ бунёд мешавад

ДУШАНБЕ, 20.08.2022 /АМИТ «Ховар»/.  Дар деҳаи Ашти поёни ноҳияи Ашт бо иштироки Раиси ноҳия Шӯҳрат Муҳаммадзода  ба бунёди бунгоҳи тиббӣ оғози расмӣ бахшида шуд. Дар ин бора ба АМИТ «Ховар» дар Мақомоти иҷроияи ҳокимияти давлатии ноҳияи мазкур хабар доданд.

Зимни маросим Раиси ноҳияи Ашт Шӯҳрат Муҳаммадзода  иброз намуд, ки вазифаи ҳар фарди ватандӯст ободу зебо намудани меҳани азиз аст. «Бо ҳидоятҳои одилонаю оқилонаи Пешвои миллат Эмомалӣ Раҳмон Тоҷикистон симои дигар гирифтааст. Мо низ иқдомҳои Ҷаноби Олиро сармашқи кори худ қарор дода, ноҳияро ободу зебо мекунем. Бунёди бунгоҳи тиббӣ мушкили мардумро осон мекунад ва ба солимии миллат замина мегузорад»,-зикр намуд ӯ.

Иттилоъ дода шуд, ки бино аз даромадгоҳ, қабулгоҳ, ҳуҷраи ташхис бо нурҳои ултрабунфш, муоина ва дигар ҳуҷраҳои ёрирасон иборат мебошад.

Ба сохтмончиён дастур дода шуд, ки дар кори сохтмон аз маҳсулоти хушсифат ва мувофиқ ба стандарҳои замони муосир истифода намоянд.

АКС: МИҲД н.Ашт