Дар Суғд оид ба омӯзиши технологияи муосири парвариши ангур ва барқарор намудани токзорҳои кӯҳна машварат доир шуд

ДУШАНБЕ, 13.08.2022 /АМИТ «Ховар»/.  Дар Хоҷагии деҳқонии «Дӯстӣ»-и ноҳияи Бобоҷон Ғафуров ва маҷлисгоҳи «Боғи миллии Ваҳдат» дар мавзӯи «Технологияи муосири парвариши ангур ва барқарор намудани токзорҳои кӯҳна» машварати илмӣ-амалии вилоятӣ баргузор гардид. Дар ин бора ба АМИТ «Ховар» дар Хадамоти матбуоти Раиси вилояти Суғд хабар доданд.

Дар машварат Раиси вилояти Суғд Раҷаббой Аҳмадзода, Вазири кишоварзии мамлакат Саъдӣ Каримзода, олимону мутахассисони соҳаи кишоварзӣ, раисони шаҳру ноҳияҳо, роҳбарони идораҳои кишоварзӣ ва хоҷагиҳои ангурпарвар иштирок намуданд.

Тавре маълумот дода шуд, хоҷагии ангурпарварӣ соли 2015 дар ҳамкорӣ ва бо истифода аз таҷрибаи бойи токпарварони шаҳри Турсунзода бунёд карда шудааст.

Масоҳати умумии хоҷагии ангурпарварии «Дӯстӣ» 3 гектарро ташкил дода, дар он 1000 бех ниҳоли ангури навъҳои «ҳусайнӣ», «шоҳона», «победа», «ҳусайнии сиёҳ» ва дигар намудҳо барои таъмини бозори дохилӣ ва ҳам содирот парвариш карда мешаванд.

Дар вилояти Суғд беш аз 20 навъи ангур парвариш гардида, тибқи дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон масоҳати токзорҳои наву муосир зиёд гардида истодааст.

Зимни машварат зикр гардид, ки бояд бо истифода аз таҷрибаи ангурпарварони Ҳисор ва Турсунзода дар минтақаҳои вилоят чунин токзорҳо бунёд карда шуда, барои зиёд намудани ҳаҷми истеҳсоли ангур, таъмини бозори дохилӣ ва содироти ин мева тадбир андешида шавад.

Иштирокдорони машварат бо тарзу усулҳои нави ангурпарварӣ шинос гардиданд.

Дар қисмати назариявӣ аз ҷониби Вазири кишоварзии мамлакат Саъдӣ Каримзода, муовини Раиси вилоят Зариф Мирдадо ва олимону мутахассисон тавсияҳои судманд дода шуданд.

АКС: Хадамоти матбуоти Раиси вилояти Суғд