Дастаи мунтахаби бонувони Тоҷикистон дар Олимпиадаи умумиҷаҳонии шоҳмот аввалин пирӯзӣ ба даст овард

ДУШАНБЕ, 01.08.2022 /АМИТ «Ховар»/. Тавре қаблан хабар дода будем, дирӯз дар доираи бозиҳои даставии Олимпиадаи умумиҷаҳонии шоҳмот дар шаҳри Ченнайи Ҳиндустон дастаи мунтахаби бонувони Тоҷикистон бар дастаи мунтахаби яккачини Арабистони Саудӣ бо ҳисоби 4:0 ғолиб омада, аввалин пирӯзии хешро истиқбол гирифт. Дар ин бора аз Федератсияи шоҳмоти Тоҷикистон ба шореҳи варзиши АМИТ «Ховар» хабар доданд.

Аз ин пеш дастаи мунтахаби бонувони Тоҷикистон дар ҳайати Сабрина Абророва, Рухшона Саидова, Мутриба Ҳотамӣ ва Лидия Антонова дар доираи бозиҳои даставии Олимпиадаи умумиҷаҳонии шоҳмот дар шаҳри Ченнайи Ҳиндустон бо дастаи мунтахаби Қирғизистон рақобат намуда, бо ҳисоби 4:0 шикаст хӯрда буд.

Дастаи мунтахаби мардонаи Тоҷикистон оид ба шоҳмот, мутаассифона, дар бозӣ ба муқобили дастаи мунтахаби Словакия бо ҳисоби 0,5-3,5 шикаст хӯрд. Дар ҳайати дастаи мо, ба истиснои мусовии Алишер Каримов се шоҳмотбози дигари тоҷик бозиҳояшонро бохтанд. Аз ин пеш дастаи мунтахаби мардонаи Тоҷикистон оид ба намуди шоҳмот дар ҳайати Муҳаммад Ҳусейнхоҷаев (бо мӯҳраҳои сафед), Алишер Каримов (бо мӯҳраҳои сиёҳ), Мустафохуҷа Ҳусейнхоҷаев (бо мӯҳраҳои сафед) ва Меҳриддин Шарифов (бо мӯҳраҳои сиёҳ) рақобати дуюми худро бо пирӯзӣ ҷамъбаст намуда, аввалин бор бар дастаи мунтахаби қавии Қазоқистон бо ҳисоби 2,5÷1,5 ғолиб омад.

Ёдовар мешавем, ки дар доираи бозии навбатӣ дастаи мунтахаби мардонаи кишвари мо ба муқобили дастаи мунтахаби Белгия рақобат мекунад.

Дастаи мунтахаби бонувони Тоҷикистон бо дастаи мунтахаби яккачини Барбадос қувваозмоӣ мекунад.

АКС аз манбаъҳои боз