ПАХТА-2022. Кишоварзони ноҳияи Кӯшониён имсол беш аз 26 ҳазор тонна «тиллои сафед» ҷамъоварӣ менамоянд

ДУШАНБЕ, 28.08.2022 /АМИТ «Ховар»/. Имсол кишоварзони ноҳияи Кӯшониёни вилояти Хатлон дар майдони 11 ҳазору 320 гектар 7 навъи тухми пунбадонаро кишт намуда, ҳоло дар аксари хоҷагиҳо маъракаи ҷамъоварӣ пахта оғоз гардидааст, иттилоъ додаанд ба АМИТ «Ховар» дар шуъбаи иттилоотӣ ва таҳлилии дастгоҳи Раиси вилояти Хатлон.

Тибқи дурнамо, кишоварзон дар соли равон 26 ҳазору 535 тонна ҳосили пахта ҷамъоварӣ менамоянд.

Ба иттилои Раёсати кишоварзии ноҳия, бо гарм омадани боду ҳавои имсола, ба сабзишу нашъунамои ниҳолони пахта таъсири мусбӣ расонид ва умед аст, ки деҳқонон аз иҷрои дурнамои пешбинигардида бо сарбаландӣ мебароянд.

Кишоварзони ноҳияи Кӯшониён тӯли чанд соли охир дар ҳамкорӣ бо олимону мутахассисони соҳа аз навъҳои «Австралӣ», «Флеш», «Хатлон –2014», «Бухоро» истифода бурда, дар натиҷаи риояи дурусти қоидаҳои парвариш ҳосили дилхоҳи пахтаро ба даст меоранд.
Айни замон дар пахтазори ноҳияи Кӯшониён садҳо нафар сокинон ба ҷамъоварии пахта баромада, ин маъракаи натиҷабахшро рӯз то рӯз вусъати тоза мебахшанд.

Масъулин дар ҳамкорӣ бо хоҷагидорон ҷиҳати беталаф ҷамъоварӣ намудани ҳосил барои ҳавасмандии чинакчиён шароити мусоид фароҳам меоранд.

АКС: шуъбаи иттилотӣ ва таҳлили дастгоҳи Раиси вилояти Хатлон