«ПОМИРИНВЕСТ-2022». Форуми байналмилалӣ ба Бадахшон сармоя ҷалб менамояд

Август 17, 2022 11:37

ДУШАНБЕ 17.08.2022 /АМИТ «Ховар»/. Имрӯз дар маркази маъмурии Бадахшон — шаҳри Хоруғ Форуми байналмилалии соҳибкорию сармоягузории «Помиринвест -2022» оғоз гардид.

АМИТ «Ховар» бо истинод ба Кумитаи давлатии сармоягузории ҷумҳурӣ иттилоъ медиҳад, ки дар маросими ифтитоҳи Форуми байналмилалӣ, ки беш аз 200 нафар соҳибкорону сармоягузорон ва шарикони рушд иштирок доранд, Раиси Вилояти Мухтори Кӯҳистони Бадахшон Алишер Мирзонабот, Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон Саъдӣ Қодирзода, Вазири саноат ва технологияҳои нави ҷумҳурӣ Шералӣ Кабир ва намояндагони шарикони рушд сухан намуда, нақши форумро дар рушд ва ҷалби сармоя ба иқтисодиёти Бадахшон муҳим арзёбӣ намуданд.

Ҳадафи Форуми байналмилалии соҳибкорию сармоягузории «Помиринвест -2022» ҷалби сармоя ба рушди соҳаҳои иқтисодию иҷтимоии ин минтақаи баландкӯҳи кишвар ва муаррифии имконияти сармоягузории Бадахшон ба сармоягузорони ватанӣ ва хориҷӣ мебошад.

Форуми байналмилалии соҳибкорию сармоягузории «Помиринвест» анъанавӣ буда, ҳамасола бо мақсади ҷалби ҳарчи бештари сармояи хориҷӣ ба Бадахшон гузаронида мешавад ва дар он соҳибкорону сармоягузорони хориҷӣ, созмонҳои байналмилалӣ, шарикони рушд ва намояндагони вазорату идораҳои марбутаи кишвар иштирок доранд.


Форуми байналмилалии соҳибкорию сармоягузории «Помиринвест-2022» аз бахшҳои гуногун, назири саноат, энергетика, сайёҳӣ иборат буда, иштирокдорони он роҳҳои ҷалби сармоя ба рушди иқтисоди Бадахшонро баррасӣ менамоянд.

Интизор меравад, ки иштирокдорони Форуми байналмилалии «Помиринвест -2022» аз корхонаҳои истеҳсолӣ ва мавзеъҳои таърихию фарҳангии Бадахшон, аз ҷумла корхонаи истеҳсолии «Чипсбарорӣ», фаъолияти намояндагии «Саноатсодиротбонк», Боғи ботаникӣ, Парки технологии Помир, Донишгоҳи Осиёи Марказӣ, Осорхонаи Носири Хусрав ва Осоишгоҳи Гармчашма боздид намоянд. Инчунин дар мавзеи Теми шаҳри Хоруғ фаъолияти Минтақаи озоди иқтисодии Ишкошим муаррифӣ мегардад.

Дар доираи баргузории Форуми байналмилалии «Помиринвест-2022» имрӯз дар шаҳри Хоруғ намоиши молу маҳсулоти саноатию кишоварзӣ ва ҳунарҳои дастӣ ташкил карда шуд.

Инчунин интизор меравад, ки дар доираи Форуми «Помиринвест-2022» мулоқоти соҳибкорону сармоягузрон дар шакли В2В доир гардида, миёни ширкату корхонаҳо ва соҳибкорону сармоягузорон бо мақсади ҷалби ҳарчи бештари сармоя ва рушди иқтисоди Бадахшон санадҳои ҳамкорӣ ба имзо расанд.

Баргузории форуми мазкур далели он аст, ки рушду пешрафти гӯшаи дурдаст ва баландкӯҳи Тоҷикистон –Бадахшон пайваста дар мадди назари роҳбарият ва ҳукумати мамлакат қарор дорад.

Марзия САИДЗОДА,
АМИТ «Ховар»

АКС: Кумитаи давлатии сармоягузорӣ ва идораи амволи давлатии ҶТ

Август 17, 2022 11:37

Хабарҳои дигари ин бахш

Соли 2022 «Тоҷиксуғурта» ба буҷети ҷумҳурӣ қариб 7 миллион сомонӣ маблағ ворид намуд
БАХШИДА БА СОЛҲОИ РУШДИ САНОАТ. Корхонаҳои саноатии Хуҷанд соли 2022 ба маблағи беш аз 1,7 миллиард сомонӣ маҳсулот истеҳсол намуданд
Дар Душанбе дурнамои ҳамкории тиҷоративу иқтисодии Тоҷикистон ва Русияро баррасӣ намуданд
НАМОИШГОҲИ БАЙНАЛМИЛАЛИИ САЙЁҲИИ ITB BERLIN 2023. Ҳайати Тоҷикистон барои иштирок дар он омодагӣ мебинад
БА ИСТИҚБОЛИ 35-СОЛАГИИ ИСТИҚЛОЛИ ДАВЛАТӢ. Дар вилояти Суғд бунёди зиёда аз 700 корхонаву коргоҳи нави саноатӣ ба нақша гирифта шудааст
Соли 2022 Агентии «Тоҷикстандарт» наздик ба 888 ҳазор кг маҳсулоти гуногуни ба талабот ҷавобгӯ набударо ба қайд гирифт
ИСТИФОДАИ САМАРАНОКИ ЗАМИН. Деҳқони соҳибтаҷрибаи ноҳияи Қубодиён Азамат Абдураҳмонов ба ҳамдеҳагонаш ташкили дурусти гармхонаҳоро меомӯзонад
Соли 2022 яке аз солҳои рекордии болоравии нархҳои озуқа дар ҷаҳон гардид
Робитаҳои байналмилалии Хадамоти назорати давлатии бехатарии корҳо дар саноат ва соҳаи кӯҳкорӣ тақвият меёбанд
Бонки ҷаҳонӣ омода аст, ки ҳамкориро бо «Амонатбонк» густариш диҳад
«ТОҶИКИСТОН-ГАВҲАРИ КАШФНОШУДА ДАР САМОИ САЙЁҲӢ». Дар Душанбе Форум ва Намоишгоҳи байналмилалиии сайёҳӣ доир карда мешаванд
Дар Тоҷикистон дар доираи «Барномаи ҳамкорӣ дар соҳаи омӯзиши геологии қаъри замин барои солҳои 2023-2025» корҳо оғоз ёфтаанд