Роҳбарияти вилояти Омск барои имзои созишнома бо вилояти Хатлон ба Тоҷикистон меояд

Август 9, 2022 14:58

ДУШАНБЕ, 09.08.2022 /АМИТ «Ховар»/. 4-6 август сафари кории Консули генералии Ҷумҳурии Тоҷикистон дар шаҳри Новосибирск Давлатхоҷа Ятим ба шаҳри Омск баргузор гардид. Дар ин бора ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

«Ҳадафи сафари мазкур — иштирок дар чорабиниҳо бахшида ба таҷлили Рӯзи шаҳр, анҷом додани мулоқот бо масъулини вилояти Омск, донишҷӯёни аз ҳисоби шаҳрвандони Ҷумҳурии Тоҷикистон, дар муассисаҳои олии таълимии шаҳр таҳсилкунанда, фаъолони ҷамъияти тоҷикон ва муҳоҷирони меҳнатӣ буд», — зикр намуданд дар ВКХ Тоҷикистон.

Дар доираи ин сафар 5 август мулоқоти Консули генералии Ҷумҳурии Тоҷикистон бо муовини якуми Раиси ҳукумати вилояти Омск Дмитрий Ушаков баргузор гардид.

Зимни мулоқот ҷонибҳо вазъи кунунӣ ва дурнамои рушди муносибатҳои минтақаҳои Тоҷикистон ва вилояти Омскро дар бахшҳои тиҷорату иқтисод, кишоварзӣ, тиббӣ, фарҳангӣ, гуманитарӣ ва сайёҳӣ мавриди баррасӣ қарор доданд.

Зикр гардид, ки кишварҳо барои рушди ҳамкорӣ иқтидори бузург ва имконияти васеъ доранд. Дар ин замина консули генералӣ омодагии худро барои мусоидати ҳамаҷониба дар рушд ва тавсеаи равобити байниминтақавӣ изҳор дошт.

«Таваҷҷуҳи хосса ба танзими сафари ҳайати вилояти Омск таҳти роҳбарии раиси вилоят ба Тоҷикистон ва имзои созишномаи ҳамкорӣ бо вилояти Хатлон зоҳир гардид»,- таъкид намуданд дар Вазорати корои хориҷии ҶТ.

Дар доираи ин сафар Консули генералии Тоҷикистон инчунин дар «Хонаи дӯстӣ»-и шаҳри Омск бо раҳбарияти ин марказ мулоқот намуда, аз намоишгоҳи ҳунарҳои мардуми вилояти Омск дидан кард. Бо шиносоӣ аз ашёи ифодакунандаи фарҳангу зиндагии мардуми тоҷик, ки ба намоиш гузошта шуда буданд, ҷонибҳо ба мувофиқа расиданд, ки дар ояндаи наздик ин гӯшаро боз ҳам васеътар карда, дар он ашёи гулдӯзии дастӣ, либосҳои миллӣ, асбоби мусиқӣ ва дигар ҳунарҳои мардумиро ба маърази тамошо гузоранд.

Пас аз мулоқот бо роҳбарияти Хонаи дӯстӣ Консули генералӣ бо фаъолони диаспораи тоҷикон мулоқот анҷом дод. Дар вохӯрӣ Консули генералӣ аз ҳамаи ҳозирин ҷиҳати саҳм гузоштан дар тарбияи насли наврас дар рӯҳияи ҳувияти миллӣ, эҳтиром ба суннат ва фарҳанги ниёгон, кумаки саривақтӣ дар ҳалли мушкилоти ба миёномадаи муҳоҷирони меҳнатӣ, инчунин татбиқи фаъолонаи ташаббусҳое, ки ба таҳкими сулҳу иттифоқ байни миллатҳо ва амалинамоии фаъолияти маънавӣ-маданӣ ва варзишӣ миёни ҷавонон даъват ба амал овард.

Ҳамчунин 5 август мулоқоти Консули генералӣ бо иҷрокунандаи вазифаи ректори Донишгоҳи давлатии техникии Омск Дмитрий Маевский ва донишҷӯён аз ҷумлаи шаҳрвандони Ҷумҳурии Тоҷикистон баргузор гардид. Зимни мулоқот рушди минбаъдаи ҳамкорӣ оид ба масъалаҳои мавриди таваҷҷуҳи тарафайн, инчунин раванди таълим, шароити будубоши донишҷӯёни тоҷик матраҳ шуд. Дар вохӯрӣ бо донишҷӯён Консули генералӣ аз онҳо даъват ба амал овард, ки тибқи дастуру супоришҳои Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амал намуда, дар чорабиниҳои оммавӣ, аз ҷумла чорабиниҳои донишгоҳ фаъолона иштирок намуда, намунаи равшани дӯстиву ҳамдигарфаҳмӣ бошанд.

Ҳамчунин Консули генералии Тоҷикистон дар чорабинии идона бахшида ба таҷлили Рӯзи шаҳри Омск ширкат кард.

Дар чорабинӣ инчунин намояндагони шаҳрҳои хориҷӣ, шаҳрҳои Русия ва намояндагони муассисаҳои дипломатӣ дар минтақа ширкат доштанд.

Акс: ВКХ ҶТ

Август 9, 2022 14:58

Хабарҳои дигари ин бахш

ҲАМДИЛӢ АЗ ҲАМЗАБОНӢ БЕҲТАР АСТ. 31 соли муносибатҳои дипломатӣ байни Тоҷикистон ва Туркия
Тоҷикистон ва Қирғизистон масоили омодагӣ ба чорабиниҳои соли 2023 дар сатҳи олӣ доиршавандаро баррасӣ карданд
Вазирони корҳои хориҷии Тоҷикистон ва Озарбойҷон суҳбати телефонӣ анҷом доданд
Дар Русия ғолибони Озмун барои беҳтарин мақола бахшида ба 30-солагии Иҷлосияи Шўрои Олии Тоҷикистон муайян шуданд
Дар Москва ҷаласаи навбатии Шӯрои ҷамъиятии назди Сафорати Ҷумҳурии Тоҷикистон дар Федератсияи Русия баргузор гардид
Тоҷикистон ва Италия масъалаҳои рушди муносибатҳои мутақобилан судмандро баррасӣ карданд
Дар Остона бизнес-форумҳои Тоҷикистон ва Қазоқистон баргузор карда мешаванд
Тоҷикистон ва Арабистони Саудӣ масъалаҳои ҳамкории дуҷониба ва бисёрҷонибаро баррасӣ карданд
Гурӯҳи давлатҳои аъзои СҲИ аз номзадии Тоҷикистон барои касби узвияти ғайридоимии Шӯрои амнияти СММ ҷонибдорӣ намуд
Дар Милан имконоти сармоягузорӣ ва сайёҳии Тоҷикистон муаррифӣ гардид
Тоҷикистон ва Қазоқистон масоили марбут ба боркашонӣ ва ҳамлу нақл байни ду мамлакатро баррасӣ намуданд
Дар Остона масъалаи воридоти нафту газ аз Қазоқистон ба Тоҷикистон баррасӣ карда шуд