Тоҷикистон ва Узбекистон масоили марбут ба ҳамкории байнисарҳадӣ дар соҳаи ҳифзи муҳити зистро баррасӣ намуданд
ДУШАНБЕ, 31.08.2022 /АМИТ «Ховар»/. Масъалаҳои марбут ба ҳамкории байнисарҳадӣ дар соҳаи ҳифзи муҳити зист миёни Тоҷикистон ва Узбекистон имрӯз дар Душанбе зимни ҳамоише, ки дар мавзӯи «Иқтидори рушди ҳамкории байнисарҳадӣ оид ба ҳудудҳои табиии махсусмуҳофизатшаванда (ҲТММ) миёни Ҷумҳурии Тоҷикистон ва Ҷумҳурии Узбекистон» доир гардид, баррасӣ шуд. Дар ин бора АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад.
Ҳамоиши мазкур дар доираи «Моҳи амалиёти иқлими сабз» доир гардида, дар он мутахассисони бахши ҳифзи муҳити зисти Тоҷикистон ва Узбекистон иштирок намуданд.
Муовини якуми Раиси Кумитаи ҳифзи муҳити зисти назди Ҳукумати Ҷумҳурии Тоҷикистон Зарафо Қиёмзода зикр намуд, ки ҳамоиши мазкур идомаи чорабиниҳои амалӣ дар доираи Ёддошти тафоҳум миёни Кумитаи ҳифзи муҳити зисти назди Ҳукумати Ҷумҳурии Тоҷикистон ва Кумитаи давлатии Ҷумҳурии Узбекистон оид ба экология дар соҳаи ҳифзи муҳити зист ва самаранок истифода бурдани табиат, ки 2 июни соли 2022 зимни сафари кории Асосгузори сулҳу ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Тошканд ба имзо расида буд, маҳсуб мешавад. Ҳамзамон ба ташриф овардани мутахассисони тоҷику узбек ба кишварҳои ҳамдигар ишора гардид.
Дар ҳамоиш намояндаи Кумитаи давлатии Ҷумҳурии Узбекистон оид ба экология Бобурҷон Маҳмудов гуфт, ки Тоҷикистон ва Узбекистон аъзои конвенсияҳои байналмилалӣ, аз ҷумла, конвенсияи Созмони Милали Муттаҳид /СММ/ оид ба гуногунии биологӣ, конвенсияҳои Бонн ва Ромсар ҳастанд. “Дар шароити тағйирёбии иқлим кишварҳои моро зарур аст, ки баҳри ҳифзу нигоҳдории экосистемаҳо, ландшафтҳо ва олами набототу ҳайвонот саъю талош варзанд. Танҳо дар асосии ҳамкории минтақавӣ метавон ба натиҷаҳои назаррас ноил гашт”,- таъкид кард Бобурҷон Маҳмудов.
Ҳамзамон мутахассисони тоҷик бо ҳамтоёни узбекашон дар бораи ҳолати мамнӯъгоҳҳои кишварҳо ва дурнамои ҳамкории байнисарҳадӣ дар соҳаи ҳифзи муҳити зист изҳори назар намуданд.
Сафари кории мутахассисони бахши ҳифзи муҳити зисти Узбекистон ба Тоҷикистон аз 31 август то 3 сентябр идома ёфта, меҳмонон аз Парки табиӣ-таърихии Ширкент боздид менамоянд.
АКС: Кумитаи ҳифзи муҳити зисти назди Ҳукумати Ҷумҳурии Тоҷикистон
Имрӯз Кумитаи дин, танзими анъана ва ҷашну маросим, Агентии назорати маводи нашъаовар, Агентии «Тоҷикстандарт», КВД «Хоҷагии манзилию коммуналӣ» ва КВД «Тоҷиксуғурта» нишасти матбуотӣ баргузор менамоянд
Имрӯз дар Тоҷикистон борон меборад
Дар ноҳияи Файзобод моҳияти Паёми Президенти Тоҷикистон ба Маҷлиси Олӣ тавзеҳ дода шуд
Имрӯз дар баъзе минтақаҳои Тоҷикистон борони пуршиддат ва барф пешгӯӣ мешавад
Фурудгоҳи байналмилалии Душанбе ба зиёда аз 1,7 миллион нафар мусофирон хизмат расонидааст
Дар ҳошияи Паёми Президенти Тоҷикистон ба Маҷлиси Олӣ бо ҷавонони ноҳияи Шаҳринав вохӯрӣ доир карда шуд
Агентии беҳдошти замин ва обёрии Тоҷикистон соли 2022 ба дарозии 50,5 км корҳои соҳилмустаҳкамкунӣ гузаронидааст
ВАЗЪИ ҲАВО. 1-2 феврал дар минтақаҳои кӯҳӣ ва доманакӯҳи Тоҷикистон фаромадани тарма дар назар аст
Имрӯз Вазорати нақлиёт, Агентии авиатсияи гражданӣ, Хадамоти назорати давлатии бехатарии корҳо дар саноат ва соҳаи кӯҳкорӣ ва Саридораи геология нишасти матбуотӣ баргузор менамоянд
Дар ҳудуди шаҳри Душанбе мониторинги минтақаҳои хавфнок гузаронида шуд
