Дар Москва бахшида ба 30-солагии барқарории муносибатҳои дипломатии Тоҷикистон ва Русия намоиши аксҳо доир гардид

ДУШАНБЕ, 06.09.2022 /АМИТ «Ховар»/. 5 сентябр дар бинои Вазорати корҳои хориҷии Федератсияи Русия намоишгоҳи аксҳо бахшида ба 30-солагии барқарорсозии муносибатҳои дипломатӣ миёни Тоҷикистон ва Русия кушода шуд. Дар ин бора ба АМИТ «Ховар» котиби матбуоти Вазорати корҳои хориҷии Тоҷикистон Шоҳин Самадӣ аз Москва хабар дод.

Дар маросими ифтитоҳ роҳбарони ниҳодҳои сиёсати корҳои хориҷии Тоҷикистон Сироҷиддин Муҳриддин ва Русия Сергей Лавров ширкат намуданд.

Дар намоишгоҳ аксҳо ва ҳуҷҷатҳои нодир аз бойгонӣ, ки бозгӯкунандаи оғози ҳамкории ду кишвар буда, ба ташаккул ва рушди муносибатҳои дипломатии Тоҷикистон ва Русия замина гузоштаанд, ба намоиш гузошта шудаанд.Тавре қаблан хабар додем, 5 сентябр бо даъвати Вазири корҳои хориҷии Федератсияи Русия Сергей Лавров Вазири корҳои хориҷии Ҷумҳурии Тоҷикистон Сироҷиддин Муҳриддин ба муносибати 30-юмин солгарди истиқрори муносибатҳои дипломатии ду кишвар ба Федератсияи  Русия сафари расмӣ анҷом дод.

Акс: ВКХ ҶТ