Кишварҳои Осиёи Марказӣ ва ИМА таҳкими амнияти иқтисодиро баррасӣ намуданд

ДУШАНБЕ, 29.09.2022 /АМИТ «Ховар»/. Роҳбарон ва намояндагони вазоратҳои корҳои хориҷии Тоҷикистон, Қазоқистон, Қирғизистон, Туркманистон, Узбекистон ва Иёлоти Муттаҳидаи Амрико дар нишасти формати «С5+1» масъалаҳои мустаҳкам намудани амнияти иқтисодӣ, инчунин зарурати рафъи ихтилофот бо роҳи дипломатиро муҳокима намуданд, хабар медиҳад АМИТ «Ховар» бо истинод ба  изҳороти муштараке, ки дафтари матбуоти департаменти давлатии ИМА 28 сентябр нашр кардааст.

Нишасти формати «С5+1» 22 сентябр дар Ню-Йорк дар доираи иҷлосияи 77-уми Ассамблеяи Генералии СММ баргузор гардид.

«Онҳо ба се даҳсолаи шарикии мутақобилан судманди панҷ кишвари Осиёи Марказӣ ва ИМА таваҷҷуҳ зоҳир намуда, ҷонибдории тағйирнопазири риояи Оинномаи СММ, алалхусус принсипҳои эҳтироми соҳибистиқлолӣ, соҳибихтиёрӣ ва яклухтии тамоми мамлакатҳоро зикр намуданд. Иштирокчиён ҳамчунин аҳамияти ҳифзи сулҳу амният ва ҳалли баҳсҳоро тавассути дипломатия таъкид карданд», -гуфта мешавад дар ҳуҷҷат.

Кишварҳо тарафдории худро барои ҳамкории зичтар ҷиҳати дастгирии бахши хусусӣ ва мубориза бо тағйирёбии иқлим тасдиқ карданд.

АКС:MFA_KZ/Twitter