Консепсияи гузариш ба таҳсилоти рақамӣ дар Ҷумҳурии Тоҷикистон барои давраи то соли 2042 тасдиқ гардид

Сентябрь 7, 2022 10:46

ДУШАНБЕ, 07.09.2022. /АМИТ «Ховар»/. Бо қарори Ҳукумати мамлакат 30 августи соли равон Консепсияи гузариш ба таҳсилоти рақамӣ дар Ҷумҳурии Тоҷикистон барои давраи то соли 2042 тасдиқ гардид. Вобаста ба қабули Консепсияи мазкур хабарнигори АМИТ «Ховар» бо Директори Маркази ҷумҳуриявии технологияи информатсионӣ ва коммуникатсияи назди Вазорати маориф ва илми Ҷумҳурии Тоҷикистон Абдураҳмон Гулзода ҳамсуҳбат гардид. 

АМИТ «Ховар»: Ҳадаф аз қабул гардидани Консепсияи гузариш ба таҳсилоти рақамӣ дар Ҷумҳурии Тоҷикистон барои давраи то соли 2042 чист ва он чанд марҳиларо дар мегирад?

А. Гулзода:  Ҳадаф аз гузариш ба таҳсилоти рақамӣ тавассути ТИК (технологияи иттилоотӣ-коммуникатсионӣ) дар муассисаҳои таҳсилоти миёнаи умумӣ тағйир додани шаклу усулҳои таълим ва ба талаботи давр мутобиқ намудани он мебошад.

Тибқи лоиҳа, Консепсияи гузариш ба таҳсилоти рақамӣ дар Ҷумҳурии Тоҷикистон дар се марҳала: солҳои  2023 – 2026, 2027 – 2030  ва 2030 – 2040 татбиқ мегардад.

АМИТ «Ховар»:  Мегуфтед, ки дар Консепсия  диққати асосӣ ба кадом зинаи таҳсил равона мешавад?

А. Гулзода:  Гузариш ба таҳсилоти рақамӣ дар Ҷумҳурии Тоҷикистон диққати  асосиро  ба таҳсилоти миёнаи умумӣ равона менамояд, инчунин тамоми зинаҳои дигари таҳсилро фаро хоҳад гирифт. Он бо назардошти рушди ҷомеа ва навсозии системаи таҳсилот таҳия шуда, аз ҷумла арзишҳои миллию башарӣ, дастовардҳои илмию техникиро фаро мегирад.

Бо амалӣ шудани таҳсилоти рақамӣ формати (шакли) идоракунии муассисаҳои таҳсилотӣ тадриҷан тағйир меёбад. Дар муассисаҳои таҳсилотӣ муҳити ба истилоҳ рақамӣ ташкил меёбад. Дар оянда рӯзномаҳои электронӣ, тахтаҳои электронӣ бо мундариҷаи интерактивӣ, компютерҳо ва планшетҳо истифода мешаванд.

АМИТ «Ховар»: Дар раванди иҷро гардидани ин Консепсия  вазифаҳои омӯзгор низ тағйир меёбанд?

А. Гулзода:  Дар раванди иҷро шудани Консепсия омӯзгор нақши «миёнарав»-ро иҷро мекунад. Вай шахсиятест, ки донишро мустақиман интиқол медиҳад ва хонандагону донишҷӯён бояд ҳар як амалро «нусхабардорӣ» кунанд.

АМИТ «Ховар»: Дар Консепсия омадааст, ки «Портали ягона» таъсис дода мешавад. Мегуфтед, ки вазифаи  он аз чӣ иборат аст?

А. Гулзода: Портал дар худ  маводи таълимии рақамиро ҳифз менамояд ва муҳассилин онро ба осонӣ дастрас менамоянд. Яке аз ин китобхонаи электронӣ мебошад. Китобхона дар сервер ҷойгир мешавад ва хонандагон аз он ройгон истифода менамоянд. Ба ҷуз ин, хонандагон имкон пайдо мекунанд китобҳоро тавассути телефони мобилӣ ва планшет истифода намоянд.  Дар портал инчунин дарсҳои видеоӣ ҷой дода мешаванд. Раванди дарси омӯзгоронеро, ки таҷрибаи хуб доранд, ба навор гирифта, дар сервер ҷой медиҳему ба хонандагон пешниҳод менамоем. Хонандагон метавонанд тавассути телефон ё планшет  дарсҳоро тамошо намоянд. Наворҳо дар шакли диск низ ба хонандагон пешниҳод мегарданд.

АМИТ «Ховар»: Вазифаҳои Консепсияи гузариш ба таҳсилоти рақамӣ дар Ҷумҳурии Тоҷикистон аз чӣ иборатанд?

А. Гулзода:  Вазифаҳои консепсияҳои мазкур- ин баланд бардоштани тахассуси омӯзгорон дар соҳаи технологияҳои рақамӣ, рушди омӯзиш бо истифодаи технологияҳои рақамӣ ва онлайнӣ, татбиқи барномаҳои таҳсилоти рақамӣ ва дарки низоми нави маориф мебошад

Яке аз вазифаҳои ҳадафҳои рушди устувор то соли 2030 таъмини тамоми духтарон ва писарон бо таҳсили пурраи ройгон, баробар ва босифат дар зинаи ибтидоӣ ва миёна бо натиҷаҳои муассири таълим ва ба таври устувор зиёд шудани шумораи ҷавонон ва калонсолони дорои малакаи муносиб ба шуғл, кори шоиста ва соҳибкорӣ мебошад. Инчунин тамоми муассисаҳои таҳсилотӣ ба захираҳои интернетӣ ва таҷҳизоти компютерӣ дастрасии васеъ пайдо менамоянд.

Ҳамчунин таъмини маводи интернетӣ барои аксари фанҳо ва васеъ ҷорӣ намудани шаклҳои интерактивии таълим бо истифода аз ТИК, аз ҷумла таҳсили фосилавӣ (онлайн)  ва рушди барномаҳои заминавии таълим бо забони тоҷикӣ ва ғайра ба роҳ монда мешавад.

Зарангези ЛАТИФ,
АМИТ «Ховар»

АКС: Хадамоти матбуоти Президенти ҶТ/АМИТ «Ховар»

Сентябрь 7, 2022 10:46

Хабарҳои дигари ин бахш

Оинномаи Донишгоҳи миллии Тоҷикистон дар таҳрири нав тасдиқ карда шуд
«ИЛМ-ФУРӮҒИ МАЪРИФАТ». Имсол шумораи ҷойҳои ифтихорӣ ва мукофоти пулӣ барои омӯзгорон зиёд карда шуд
Соли 2022 дар Тоҷикистон 199 мактаб ва бинову синфхонаҳои иловагӣ бунёд гардиданд
Дар назди Донишгоҳи технологии Тоҷикистон Коллеҷи лифт таъсис меёбад
Дар Донишгоҳи миллии Тоҷикистон бахшида ба озмунҳои ҷумҳуриявӣ ҳамоиши илмӣ баргузор шуд
Дар Донишгоҳи давлатии Кӯлоб вобаста ба баргузор намудани чор озмуни ҷумҳуриявӣ ҳамоиш доир карда шуд
Дар Хатлон дар доираи амалишавии Барномаи давлатии рушди муассисаҳои соҳаи маориф 350 муассисаи таълимӣ сохта мешаванд
Дар Донишгоҳи (славянии) Русияву Тоҷикистон мутахассисони дорусоз-гиёҳшинос омода карда мешаванд
Дар Донишгоҳи технологии Тоҷикистон ду ихтисоси нав- «зеҳни сунъӣ» ва «баҳисобгирии бухгалтерӣ, таҳлил ва аудит дар саноат» ҷорӣ карда шуд
«ИЛМ-ФУРӮҒИ МАЪРИФАТ». Соли сеюм аст, ки озмуни мазкур бо мақсади дарёфти истеъдодҳои нав дар асоси амри Президенти Ҷумҳурии Тоҷикистон доир карда мешавад
Соли 2022 дар ҷумҳурӣ 5 муассисаи таҳсилоти миёнаи умумии муштараки Тоҷикистону Русия ба истифода дода шуд
НИШАСТИ МАТБУОТӢ. Соли 2022 иштироки хонандагон дар олимпиадаҳои ҷумҳуриявию байналмилалӣ 50 фоиз афзуд