ҶОМИ ПРЕЗИДЕНТИ ТОҶИКИСТОН ОИД БА БОКС. Варзишгарони тоҷик сазовори ёздаҳ медали тилло гардиданд

Сентябрь 29, 2022 09:12

ДУШАНБЕ, 29.09.2022. /АМИТ «Ховар»/. Аз  24 то 27  сентябр дар шаҳри Хуҷанд Ҷоми Президенти Ҷумҳурии Тоҷикистон оид ба  бокс миёни калонсолон баргузор шуд. Муштзанон аз рӯи 13 вазн сабқат карда, ғолибон муайян гардиданд, хабар медиҳад хабарнигори АМИТ «Ховар».

Дар охирин рӯзи  мусобиқаи байналмилалии Ҷоми Президенти Ҷумҳурии Тоҷикистон оид ба бокс рақобатҳои финалӣ баргузор шуда,  соҳибони ҷом муайян гардиданд. Нахуст дар  вазни то 48 кг Усмонҷон Мирзоев  ва Умарқул Эрматов  барои медали тиллои мусобиқа миёни ҳам сабқат   карданд.

Рақобати муштзанон 3 давр идома кард ва билохира муштзани тоҷик Усмонҷон Мирзоев тавонист, ки  бо ҳисоби 4 бар 1 рақибаш аз Узбекистонро шикаст дода, соҳиби медали тилло ва Ҷоми Президенти Ҷумҳурии Тоҷикистон гардад.

Дар вазни то 54 кг зинаҳои сеюми ифтихорӣ насиби Бузургмеҳр Иксанов аз Тоҷикистон ва Бобур Тухтаев аз Узбекистон шуданд. Дар натиҷа  медали тиллои ин вазн ба Ҳасанов Муҳаммадалӣ  муштзани вилояти Суғд анҷом ёфт. Сабқати  ниҳоии вазни то 57 кг низ ҷолиб сурат гирифта, ду варзишгари суғдӣ дар се давр бо ҳам қувваозмоии  шадид намуданд. Ҳарду ҷониб ҳам дар раванди мубориза аз худ маҳорати баланд нишон доданд ва дар сонияҳои охир Хусравхон Раҳимов тавонист Искандарбек Рустамовро ба нокаут фиристад. Ҳамин тавр,  ғолиби ин вазн соҳиби Ҷоми Президенти Ҷумҳурии Тоҷикистон шуд.

Дар вазни то 60 кг медалҳои биринҷӣ ба варзишгарон Асланбек Азимов ва Абдулло Шарипов дода шуданд.

Барои медали тиллои   Ҷоми Президенти Ҷумҳурии Тоҷикистон Абубакр Муродзода аз вилояти Хатлон ва Абдураҳим Ёқубов аз вилояти Суғд миёни ҳам  рақобат  карданд. Дар ин  сабқати ҷолиб  Абдураҳим Ёқубов зафар ёфт.

Мавриди зикр аст, ки  Ҷоми Президенти Ҷумҳурии Тоҷикистон дар вазни то 66,5 кг ба Ҷумҳурии Узбекистон рафт,  зеро дар рақобати ниҳоӣ ду варзишгари ҳамин кишвар-  Уткурбек  Абдулқодиров  ва Сулаймон  Латипов     бо ҳам қувва озмуданд. Дар ин нерусанҷӣ аз оғоз Сулаймон Латипов зарбаҳои ҳадафрастар дошта, пеш аз муҳлати анҷоми сабқат ҳарифашро шикаст дод. Ин рақобатро Мансур Муҳидинов- довари дараҷаи олимпӣ аз Тоҷикистон  идора мекард ва пас аз як нокдаун вохӯриро қатъ карда, пирӯзӣ ва медали тиллои мусобиқаро насиби Сулаймон Латипов донист.

Дар зинаи дуюм Уткурбек Абдулқодиров ҷой гирифта,  медалҳои биринҷии мусобиқа насиби ду варзишгари тоҷик- Расул Аҳадов  ва  Шоҳин Ҳикматов гардид.

Финали вазни то 74,5 кг низ интизори мухлисон буд, зеро дар он муштзани умедбахши тоҷик Абдумалик Болтаев бо Ашурбек Ҷиянов вориди майдони рақобат шуданд. Абдумалик дар даврҳои гузашта ҳарифонашро пеш аз муҳлат ба нокаут фиристода буд ва интизор мерафт ин бор низ ҳарифашро пеш аз муҳлат шикаст диҳад. Ӯ дар пайти аввали нерусанҷӣ чанд зарбаи шадид ба ҳариф зада, ӯро ба нокдаун ҳам фиристод, бинобар ин мураббиёни Ашурбек пас аз пайти аввал рақобатро мутаваққиф карданду медали тилло  дар ин вазн насиби Абдумалик Болтаев гардид.

Дар  вазни то  80 кг  ба финал Шаҳбоз Негматуллоев ва Шаҳбоз Ҳаитов барои ба даст овардани медали тиллои мусобиқа миёни ҳам  сабқат карданд.  Рақобати муштзанон 3 раунд идома карда, дар ниҳоят  Шаҳбоз Негматуллоев бо ҳисоби 3 бар 2 музаффарият ба даст овард.  Рақобатҳо   дар  вазни то 86 кг миёни  ду варзишгари тоҷик  Наврӯз Ҷафоев ва Парвиз Каримов сурат гирифт. Ин рақобат ҳам диданӣ буд ва ду ҷониб зарбаҳои ҳадафрас низ доштанд. Дар ин вазн  Наврӯз Ҷафоев ғолиб дониста шуда, соҳиби медали тиллои мусобиқа шуд ва  медали нуқра насиби Парвиз Каримов гардид.

Муштзани узбекистонӣ  Бобур Юлдошев тавонист, ки нишони тиллои   вазни  92 килограммро соҳиб шуд.  Дар финали ин вазн Бобур  бо Насим Шарипов аз Тоҷикистон неру санҷида, се пайтро бо ғалаба анҷом дод.  Ҳамин тавр, Бобур Юлдошев дуюмин муштзан аз Узбекистон шуд, ки  медали тиллои  мусобиқаи Ҷоми Президенти Ҷумҳурии Тоҷикистонро соҳиб гардид.

Миёни сангинвазнҳо   Асадбек Манонов  зинаи сеюми ифтихориро ишғол кард. Муҳаммад Аброридинов ба гирифтани  медали нуқра даст ёфту ғолиби вазни мутлақ ва Ҷоми Президенти Ҷумҳурии Тоҷикистон муштзани  ботаҷриба ва номдори тоҷик Ҷаҳон Қурбонов шуд.

Ҳамин тавр,  дар якумин мусобиқаи Ҷоми Президети Ҷумҳурии Тоҷикистон оид ба бокс  аз сенздаҳ вазн 11-тояшро  муштзанони тоҷик соҳиб шуданд. Ду медали тиллои дигарро муштзанони узбек ба даст оварданд.

Ёдовар мешавем, ки дар рӯзи сеюми мусобиқаи байналмилалӣ  дар вазни 51 кг ва 63,5 кг рақобатҳои финалӣ доир шуданд, ки Меҳроҷ Ҳомидов ва Баҳодур Усмонов соҳиби медалҳои тиллои ин вазнҳо гардиданд.

                                                                                        АКС аз манбаъҳои боз

Сентябрь 29, 2022 09:12

Хабарҳои дигари ин бахш

ДЗЮДО. Се гӯштингири тоҷик дар мусобиқаи Тоскулоҳи бузург дар Ҷопон номнавис шудаанд
Дастаи «Зебонисо» чемпиони секаратаи Тоҷикистон миёни дастаҳои занона оид ба футбол шуд
ҶИНСИЯТ МУҲИМ НЕСТ, АСОС — СИФАТИ КОР. Фардо дар Чемпионати ҷаҳон оид ба футбол-2022 ҳодисаи таърихӣ рух медиҳад
ЧҶ-2022. Дастаи мунтахаби Эрон пас аз бохт аз ИМА ба даври баъдии мусобиқа роҳ наёфт
Ғолибони бозиҳои 31-уми Чемпионати Тоҷикистон оид ба футбол миёни дастаҳои Лигаи олӣ муайян шуданд
ЧҶ-2022: Бразилия ва Португалия пеш аз муҳлат ба марҳилаи 1/8-финал роҳ ёфтанд
Ҳендболбоздухтарони тоҷик дар Чемпионати Осиё ҷойи дуюмро сазовор шуданд
ФЕДЕРАТСИЯИ МУҲОРИБАҲОИ ОМЕХТАИ ОСИЁ ТАЪСИС ЁФТ. Дафтари марказии он дар Душанбе ҷойгир мешавад
Варзишгарони тоҷик дар Ҷоми кушоди Қазоқистон оид ба шиноварӣ 19 медал ба даст оварданд
ФУТБОЛ. Манучеҳр Ҷалилов бори чорум нишонзани беҳтарини чемпионати Тоҷикистон гардид
Варзишгари тоҷик Наврӯз Каримзод барандаи медали биринҷии Чемпионати ҷаҳон оид ба кураш гардид
ДЗЮДО. Темур Раҳимов дар Чемпионати Аврупо сазовори медали нуқра гардид