ОМОДАГӢ БА ЗИМИСТОН. Дар анбори Агентии захираҳои моддии давлатӣ дар Бадахшон миқдори кофии маҳсулоти мавриди ниёзи аввал захира шудааст

Октябрь 3, 2022 10:59

ХОРУҒ, 03.10.2022 /АМИТ «Ховар»/. Агентии захираҳои моддии давлатии назди Ҳукумати Ҷумҳурии Тоҷикистон  дар доираи қарори Ҳукумати Ҷумҳурии Тоҷикистон «Дар бораи  сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти муназзам ва самарабахш дар давраи тирамоҳу зимистони солҳо 2022-2023» миқдори муайяни маводи озуқавориро дар анборхонаҳо ва  34 нуқтаи фурӯши маҳсулоти хӯрокворӣ захира намудааст, иттилоъ додааст мухбири минтақавии АМИТ «Ховар» Файз МИРАСАН.

Дар баробари сохторҳои марбутаи таъмини бозорҳои қаламрави вилоят бо маҳсулоти мавриди ниёзи аввал  корхонаи истеҳсоли орд низ дар таъмини талаботи бозори истеъмолӣ бо орд ва захира барои давраи тирамоҳу зимистони солҳои 2022-2023 фаъолияти назаррас дорад. Иқтидори коркарди корхонаи истеҳсоли орд дар ноҳияи Шуғнон то 50 тонна гандум дар як шабонарӯз буда, дар айни замон дар иншооти саноатӣ бештар аз 30 нафар фаъолият доранд. Роҳбарияти корхона тибқи талабот барои давраи тирамоҳу зимистони солҳои 2022-2023 орди баландсифат захира  менамояд.

Намояндаи Агентии захираҳои моддии давлатии назди Ҳукумати Ҷумҳурии Тоҷикистон дар ноҳияи Шуғнон Сафаршо Саидшоев гуфт, ки “ҳоло аксари намудҳои ғизои мавриди ниёзи аввал, ба шумули орд, шакар, равған ба 34 нуқтаи фурӯш интиқол дода шуда, харидорон ин маводро бо нархи нисбат ба бозор арзонтар дастрас менамоянд. Яке аз маводе, ки талабот нисбат ба он хеле зиёд мебошад, орд аст. Инро ба назар гирифта, соли 2015 бо дастури Пешвои миллат дар деҳаи Сучони ноҳияи Шуғнон корхонаи коркарди орд сохта шуд. Дар айни замон дар корхона 30 нафар сокинони маҳаллӣ фаъолият дошта, дар як шабонарӯз 50 тонна орди хушсифат истеҳсол мешавад”.

Барои мавсими имсолаи тирамоҳу зимистон корхона дар анборхона 5 ҳазор тонна орд захира мекунад. Зеро дар фасли сармо дар ин минтақа ҳар гуна офатҳои табиӣ рух дода, боиси қатъ гардидани  ҳаракати нақлиёт дар шоҳроҳи Душанбе- Хоруғ ва водиҳои дурдасти вилоят мегарданд. Бинобар ин Агентии давлатии захираҳои моддӣ дар деҳоти дурдасти ноҳияи Муроғоб 8 нуқтаи фурӯш, дар ноҳияи  Ишкошим 6 нуқта, Ванҷ- 4 нуқта ва Рӯшон- 9 нуқтаи фурӯши маҳсулоти мавриди ниёзи аввали мардум кушодааст, ки сокинони ин ноҳияҳо дар вақтҳои зарурӣ аз ин ҷо маҳсулоти дилхоҳи худро дастрас менамоянд.

Дар анборхонаҳои ин агентӣ миқдори муайяни маводи сӯзишворӣ низ захира гардида, интиқоли он ба мавзеъҳои дурдаст идома дорад.

                                                                                           АКС: АМИТ «Ховар»

Октябрь 3, 2022 10:59

Хабарҳои дигари ин бахш

Дар МОИ «Суғд» сохтмони корхонаи истеҳсоли халта анҷом ёфта, бунёди коргоҳи нави коркарди меваю сабзавот идома дорад
РОБОТҲО БА КОР ШУРУЪ МЕКУНАНД! Дар Тоҷикистон се озмоишгоҳи зеҳни сунъӣ ба истифода дода мешавад
Вазири рушди иқтисод ва савдои Тоҷикистон дар ҷаласаи навбатии Шӯрои иқтисодии ИДМ ширкат варзид
СОЛҲОИ РУШДИ САНОАТ. Имсол дар ноҳияи Ховалинг 5 корхонаи саноатӣ ба истифода дода мешаванд
«Стратегияи рушди «иқтисоди сабз» дар Ҷумҳурии Тоҷикистон барои солҳои 2023-2037» муаррифӣ гардид
Дар вилояти Хатлон ҳаҷми истеҳсоли маҳсулоти кишоварзӣ 6,3 фоиз афзоиш ёфтааст
Ҷалби сармояи Ҷопон ба иқтисоди Тоҷикистон дар Токио мавриди баррасӣ қарор гирифт
Раванди татбиқи марҳилаи чоруми БРАМОМ-4 дар мақомоти гумрук бо ҳайати Бонки ҷаҳонӣ баррасӣ гардид
Тоҷикистон ва Бонки аврупоии таҷдид ва рушд масоили ҳамкориро баррасӣ намуданд
Заминҳои бекорхобидаи хоҷагиҳои деҳқонии ноҳияҳои Рӯшон ва Роштқалъа ба кор андохта шуданд
Тоҷикистон ва Ҷопон ҳамкории иқтисодию тиҷоратиро густариш медиҳанд
ОМОДАГӢ БА ЗИМИСТОН. Ҷаласаи Ситоди ҷумҳуриявӣ оид ба тайёрии шаҳру ноҳияҳои вилояти Суғд ба фасли сармо доир гардид