«АЗ ҚАСРИ АРБОБ ТО МАЙДОНИ ИСТИҚЛОЛ». Шумораи идонаи рӯзномаи «Ҷумҳурият» дар ҳаҷми 70 саҳифа нашр шуд

Октябрь 5, 2022 12:06

ДУШАНБЕ, 05.10.2022 /АМИТ «Ховар»/. Ба пешвози Рӯзи забони давлатӣ ва 30 — солагии Иҷлосияи XVI Шӯрои Олии Ҷумҳурии Тоҷикистон нашри махсуси 70-саҳифагии рӯзномаи «Ҷумҳурият» бо теъдоди 5000 нусха ба нашр расид. Дар ин бора зимни суҳбат бо мухбири АМИТ «Ховар» мудири шуъбаи фарҳанг ва маънавиёти рӯзномаи мазкур Муҳаммадуллоҳи Табарӣ хабар дод.

Тавре иттилоъ дода шуд, Рӯзномаи «Ҷумҳурият» нашри махсусро таҳти унвони «Аз қасри Арбоб то майдони Истиқлол» ба табъ расонд, ки дар он матолиби шахсиятҳои шинохтаи Ҷумҳурии Тоҷикистон оид ба нақши Иҷлосияи  XVI Шӯрои Олии Ҷумҳурии Тоҷикистон дар таърихи навини тоҷикон, дастовардҳои Тоҷикистон дар тӯли 31 соли истиқлолият, саҳми Пешвои миллат муҳтарам Эмомалӣ Раҳмон дар шукуфоии кишвар, ташаккули мақому манзалати забони давлатӣ дар партави сиёсати фарҳангии Пешвои миллат сухан меравад.

Нашри махсус бо суханони ходими намоёни давлатӣ Асадулло Раҳмон оғоз  мегардад, ки ӯ нақши Асосгузори сулҳу ваҳдати мллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро дар таърихи миллат ва давлатдории тоҷикон абадӣ унвон кардааст. «Дар ҳамаи давру замон дар идораи давлату рушди ҷомеа ва ояндаи пойдору устувори он роҳбарони фозилу хирадманде зарур буданд, ки ҷомеаро бо андешаҳои бунёдӣ сӯи эҳё ва ташаккул бурда, дар заминаи ҳофизаи таърихӣ давлатдориро таҳким бахшанд. Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз табори шахсиятҳоеянд, ки барои кишвари мо ва сокинони он ин асолати таърихиро иҷро намуда, баҳри рушди бесобиқаи Тоҷикистони азиз ва фардои неку дурахшони Ватан ҷоннисориҳо кардаанд.

Роҳи тайкардаи ин абармарди ҷабҳаи сиёсат фарохтар аз марзу буми Тоҷикистони азиз рафта, бо хираду фитрати азалӣ миллату давлати тозаистиқлолро дар арсаи ҷаҳони мутамаддин соҳиби ҷойгоҳи муносибу арзанда намуд. Давлатро аз нестӣ,  миллатро аз парокандагӣ эмин дошта, ваҳдати сартосариро таъмин сохт»,- нигоштааст Асаддуло Раҳмон.

Дар саҳифаҳои рӯзнома матолиби ҷолибу хонданибоби олимон Кароматулло Олимов, Фарҳод Раҳимӣ, Муҳаммадюсуф Имомзода, ходимони давлатӣ Ғайбулло Афзалов, Амиршо Миралиев, Гулафзо Савриддинова, Эмомалӣ Насриддинов ва дигаронро метавон мутолиа намуд.

Хонандагон метавонанд навиштаҳои раисони вилоятҳои ҷумҳурӣ, аз ҷумла Раиси Вилояти Мухтори Кӯҳистони Бадахшон Алишер Мирзонабот дар мавзӯи «Мактаби сиёсии Эмомалӣ Раҳмон-мактаби садоқат ба миллат аст», Раиси вилояти Суғд Раҷҷабой Аҳмадзода «Эмомалӣ Раҳмон, Истиқлол ва эҳёи давлатдории миллӣ» ва Раиси вилояти Хатлон Қурбон Ҳакимзода «Нақши Пешвои миллат дар таъмини амнияти озуқаворӣ»-ро мутолиа намоянд.

Ҳамчунин дар саҳифаи 22-и рӯзнома оид ба нақши Пешвои миллат дар бунёди нодиртарини иншооти аср- НБО «Роғун» сухан меравад, ки муаллифи он Лашкар Шарифзода нигоштааст:  «Ин иншооти муҳташами гидроэнегетикӣ, ки сохтмонаш баъди суқути давлати Шӯравӣ қатъ гардида буд, баъди ба даст овардани Истиқлолияти давлатии Ҷумҳурии Тоҷикистон танҳо бо дастгирии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон аз нав эҳё шуд. Алорағми нотавонбинон ва кишварҳое, ки зидди бунёди ин иншооти бузург буданд, бо ҷасорат ва истодагарии қатъии Сарвари давлат ва ҷалби сармояву мутахассисони баландпояи ватаниву хориҷӣ сохтмони он вусъат гирифта, ду чархаи неругоҳ ба истифода дода шуд…». Идомаи ин матлабро хонандагон метавонанд аз рӯзномаи мазкур мутолиа кунанд.

Рӯзномаи «Ҷумҳурият» дар саҳифаҳои худ бахшида ба Рӯзи забони давлатӣ навиштаи Нависандаи халқии Тоҷикистон Абдулҳамид Самад таҳти унвони «Сипари ҷовидон», ректори ДДЗТ Жило Гулназарзода дар мавзӯи «Камоли забони миллат дар каломи Пешвои миллат», ректори ДДХ ба номи академик Б.Ғафуров Аюб Усмонзода «Истиқлол ва шукӯҳи маънавии забони тоҷикӣ» ва дигар муаллифони варзидаро ба нашр расонидааст, ки ҷолиби диққатанд.

Тавре мудири шуъбаи фарҳанг ва маънавиёти рӯзномаи мазкур Муҳаммадуллоҳи Табарӣ зикр намуд, «Аз қасри Арбоб то майдони «Истиқлол» ном гирифтани саҳифаи аввали рӯзнома бесабаб нест ва  дар умум ин матлаб фалсафаи хос дорад, зеро сӣ сол қабл дар Қасри Арбоб фарзонафарзанде бо номи Эмомалӣ Раҳмон сари минбар омад, ки имрӯз дар қалби Тоҷикистон- Душанбеи гулпираҳан майдони «Истиқлол»-ро бо бурҷи ҳамном ҳамчун «манораи сулҳу бурҷи побарҷои миллат» бунёд намуданд. Тантанаи истиқлол аз ин майдон то саросари дунё рафт.

Матлаби мазкур гузориши густурдаи мухбирони рӯзномаи «Ҷумҳурият» Фарзонаи Файзалӣ, Шаҳноз Қурбон, Меҳрангез Қодирова мебошад, ки рӯзноманигорон аз ин ду макони барҷаста дидан намуда, муфассал гузориш додаанд.

Хонандагон метавонанд дар баробари матолиби ҷолибу хонданибоб ҳамчунин аз тамошои аксҳои нодире, ки ба таври ҳадиси мусаввар тасвир ёфтаанд, баҳра баранд.

Шаҳлои САДРИДДИН,
АМИТ «Ховар»,

АКС: АМИТ «Ховар»

Октябрь 5, 2022 12:06

Хабарҳои дигари ин бахш

ЭЪЛОН: «ВАССОФИ ВАТАН». Барои рӯзноманигорон ва корбарони саҳифаҳои иҷтимоии шабакаҳои интернетӣ фестивал-озмун баргузор мешавад
Тандиси биринҷии чеҳраи Президенти Тоҷикистон ба Осорхонаи миллӣ супорида шуд
АЗ НАВРӮЗ ТО НАВРӮЗ. Дар Донишкадаи давлатии санъати тасвирӣ ва дизайни Тоҷикистон фестивали муд баргузор мегардад
ИМРӮЗ-РӮЗИ ҶАҲОНИИ ТЕАТР. Дар давраи соҳибистиқлолӣ дар Тоҷикистон барои пешрафти санъати касбии театрӣ шароити мусоид фароҳам оварда шуд
«САЙРИ ГУЛИ ЛОЛА». Дар Суғд Фестивали вилоятии гулҳо доир мешавад
КОНИ ЛАЗЗАТ ВА ХОНИ НЕЪМАТ. Хабарнигори АМИТ «Ховар» оид ба таомҳои наврӯзӣ дар Бадахшон маълумот ҷамъоварӣ намуд
НАВРӮЗ-МАҲБУБТАРИН ҶАШНИ МИЛЛИИ ТОҶИКОН. Суратгузориш аз таҷлили бошукуҳи ҷашни Наврӯз дар Академияи миллии илмҳои Тоҷикистон
Байни Китобхонаи миллии Тоҷикистон ва Китобхонаи оммавӣ, илмӣ-техникии шуъбаи Академияи илмҳои Русия дар минтақаи Сибир Созишномаи ҳамкорӣ ба имзо расид
Оши бурида дар Наврӯз ҳамчун рамзи умри дароз ва ҳаёти хушбахтона омода мешавад
НАВРӮЗ — ҶАШНИ ЭҲЁ. Ин ҷашни ҷаҳонӣ бунёди маънавии миллати тоҷик мебошад
МАЗМУНҲОИ НАВРӮЗӢ ДАР АШЪОРИ АҲДИ КЛАССИКИИ ФОРСУ ТОҶИК. Андешаҳои адабиётшинос дар хусус
НАВРӮЗ ДАР ЗАРАФШОН. Он бо «тухмҷангак»-и кӯдакон оғоз мегардад