Дар Кувайт масъалаи баргузории Конфронси оби СММ-2023 дар Ню-Йорк баррасӣ гардид

ДУШАНБЕ, 04.10.2022 /АМИТ «Ховар»/. 3 октябр мулоқоти якҷояи Сафири Ҷумҳурии Тоҷикистон дар Давлати Кувайт Зубайдулло Зубайдзода ва сафири Подшоҳии Нидерланд Лоренс Вестхоф бо муовини Вазири корҳои хориҷии Давлати Кувайт оид ба масъалаҳои байналмилалӣ Абдулазиз Сауд ал-Ҷоруллоҳ доир гардид. Дар ин бора ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

Дар мулоқот ҷонибҳо масъалаи баргузории Конфронси Созмони Милали Муттаҳид оид ба шарҳи фарогири миёнамуҳлати ҳадафҳои Даҳсолаи байналмилалии амал «Об барои рушди устувор», солҳои 2018-2028-ро, ки қарор аст таҳти раисии Ҷумҳурии Тоҷикистону Подшоҳии Нидерланд дар шаҳри Ню-Йорк 22-24 марти соли 2023 баргузор гардад, баррасӣ намуданд.

Ёдовар мешавем, ки Конфронси дуюми байналмилалии сатҳи баланд оид ба Даҳсолаи байналмилалии амал «Об барои рушди устувор», солҳои 2018-2028 таҳти унвони «Такон бахшидан ба амалҳо ва шарикӣ дар соҳаи об дар сатҳҳои маҳаллӣ, миллӣ, минтақавӣ ва ҷаҳонӣ” 6-9 июни соли 2022 дар Душанбе баргузор гардид.

Конфронси оби СММ баъд аз Конфронси оби сатҳи баланди соли 1977 дар Мар-дел-Плата нахустин Конфронси оби СММ дар чунин сатҳ ба ҳисоб меравад.

Акс: ВКХ ҶТ