Саъдӣ Қодирзода дар ҷаласаи ҳафтуми Шӯрои мудирони Бонки Осиёии Сармоягузории Инфрасохторӣ иштирок намуд

ДУШАНБЕ, 28.10.2022 /АМИТ «Ховар»/. Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, мудири Бонки Осиёии Сармоягузории Инфрасохторӣ дар Ҷумҳурии Тоҷикистон Саъдӣ Қодирзода 26 октябр дар ҷаласаи ҳафтуми Шӯрои мудирони бонк дар шакли маҷозӣ иштирок ва суханронӣ намуд. Дар ин бора ба АМИТ «Ховар» дар Кумитаи мазкур хабар доданд.

Зимни ҷаласа зикр гардид, ки таҳкими пайвастаи муносибатҳо ва ҳамкории сармоягузориву инфрасохторӣ дар доираи Бонки Осиёии Сармоягузории Инфрасохторӣ ба таъмини рушди мутавозин ва устувории кишварҳои аъзо мусоидат мекунад.

Ҷаласаи солонаи бонк бо иштироки беш аз 220 намоянда аз кишварҳои узви Бонки Осиёии Сармоягузории Инфрасохторӣ баргузор гардид.

Изҳори итминон карда шуд, ки ҳамкории судманд миёни Бонки Осиёии Сармоягузории Инфрасохторӣ ва Ҷумҳурии Тоҷикистон дар бахшҳои афзалиятнок тавсеа ёфта, ташаббусҳо ва лоиҳаҳои нав боз ҳам фаъол мегарданд.

Дар фарҷоми ҷаласа иброз гардид, ки ҷаласаи 8-уми солонаи бонк 25-26 сентябри соли 2023 дар шаҳри Шарм-уш-Шайхи Ҷумҳурии Мисри Араб баргузор мегардад.

Бояд зикр намуд, ки Бонки Осиёии Сармоягузории Инфрасохторӣ яке аз шарикони муҳими ҷумҳурӣ буда, дар доираи ҳамкории судманд бо ин ташкилоти байналмилалии молиявӣ татбиқи лоиҳаҳои инфрасохторӣ ба маблағи беш аз 140 миллион доллар идома дорад.

АКС: Кумитаи давлатии сармоягузорӣ ва идораи амволи авлатии Ҷумҳурии Тоҷикистон