Созишномаи грантӣ миёни Тоҷикистон ва Бонки Осиёии Рушд дар Душанбе ба имзо расид

ДУШАНБЕ, 19.10.2022 /АМИТ «Ховар»/. 18 октябр дар Вазорати молияи Тоҷикистон Созишномаи грантӣ миёни Ҷумҳурии Тоҷикистон ва Бонки Осиёии Рушд оид ба лоиҳаи «Обтаъминкунӣ ва санитарияи шаҳри Душанбе – маблағгузории иловагӣ»   ба имзо расонида шуд, хабар медиҳад АМИТ «Ховар» бо истинод ба ин вазорат.

Созишномаи мазкурро Вазири молияи Ҷумҳурии Тоҷикистон Файзиддин Қаҳҳорзода ва намояндаи доимии Бонки Осиёии Рушд дар Тоҷикистон хонум Шэнни Кемпбл ба имзо расониданд.

Арзиши умумии Лоиҳа 42,63 млн доллари амрикоиро ташкил дода, аз он 38 млн доллар гранти Бонки Осиёии Рушд ва 4,63 млн доллар саҳми Ҳукумати Ҷумҳурии Тоҷикистон мебошад.

Ҳадафи лоиҳа- ин беҳтар намудани дастрасии фарогир ва устувор ба хизматрасониҳои бехатар, устувории обтаъминкунӣ ва санитария дар шаҳри Душанбе, инчунин барқарор кардани коллекторҳои канализатсионии асосии шаҳр ва сохтани системаи канализатсияи дуюм ва сеюм дар маҳаллаҳои Қаротегин ва Зебуниссо мебошад.

Татбиқи лоиҳаи мазкур соли 2022 оғоз ёфта, анҷоми он соли 2028 ба нақша гирифта шудааст.

АКС: Вазорати молияи Ҷумҳурии Тоҷикистон