Ҳамкории судманд миёни низомҳои бонкии Тоҷикистон ва Швейтсария муҳокима шуд
ДУШАНБЕ, 03.11.2022 /АМИТ «Ховар»/. Бо мақсади вусъат бахшидани ҳамкории дуҷониба ва боз ҳам беҳтар кардани рушди низоми бонкии кишвар 31 октябр Раиси Бонки миллии Тоҷикистон Ҳоким Холиқзода бо ҳайати Бонки миллии Швейтсария таҳти сарварии роҳбари аъзои алтернативии раёсати Бонки миллии Швейтсария Аттилио Заннети мулоқот баргузор намуд.
Тавре ба АМИТ «Ховар» дар Бонки миллии Тоҷикистон хабар доданд, Ҳоким Холиқзода маълумоти заруриро оид ба вазъи низоми бонкии ҷумҳурӣ пешниҳод ва сатҳи ҳамкории дуҷонибаро самаровар арзёбӣ намуд.
Дар ҷараёни мулоқот таъкид гардид, ки солҳои охир бинобар вазъи душвори геосиёсӣ ва бо назардошти афзоиши фаъолнокии бонкҳои тиҷоратӣ дар кишвар барқарор намудани робитаҳои мустақими муросилотӣ миёни ташкилоти қарзии ду кишвар муҳим ва зарур арзёбӣ мегардад.
Дар баробари ин диққати ҳайати Бонки миллии Швейтсария ба густариши ҳамкорӣ дар самти сиёсати пулию қарзӣ, аудити дохилӣ, омор ва тавозуни пардохт, идоракунии захираҳои байналмилалӣ ва сиёсати қурбӣ, кумаки техникӣ оид ба таҳия ва татбиқи системаи муосири идоракунии хавфҳои амалиётӣ дар БМТ ва баланд бардоштани тахассуси кормандони Бонки миллии Тоҷикистон тавассути табодули таҷриба ҷалб карда шуд.
Роҳбари ҳайати Бонки миллии Швейтсария Аттилио Заннети аз сатҳи ҳамкории дуҷониба изҳори хушнудӣ намуда, ҷиҳати вусъат бахшидани онҳо дар оянда изҳори умед кард.
Мавсуф иброз дошт, ки мо ҳамкории худро бо Ҷумҳурии Тоҷикистон, аз ҷумла бо Бонки миллии Тоҷикистон қадр мекунем, зеро масъулияти баланди вазифавӣ ва муносибати хуб аз ҷониби ҳамкорони тоҷик низ баръало эҳсос мегардад. Бояд гуфт, ки имрӯз барои ҳамкории дуҷонибаи судманд шароити мусоид муҳайё шуда, ҷиҳати амалӣ гаштани он аз ҳарду ҷониб мутахассисони касбию кордон омодаи коранд.
Дар поёни суҳбат ҷонибҳо бори дигар барои рушди ҳамкории минбаъдаи судманд миёни низомҳои бонкии Тоҷикистон ва Швейтсария омодагии хешро баён доштанд.
АКС: Бонки миллии Тоҷикистон
Эмомалӣ Раҳмон: «Даромади буҷети давлатӣ дар солҳои соҳибистиқлолӣ беш аз 250 баробар зиёд гардид»
Пешвои миллат Эмомалӣ Раҳмон: «То соли 2037 Тоҷикистонро пурра ба кишвари «сабз» табдил медиҳем»
РОҲИ 35-СОЛАИ НИЗОМИ БОНКИИ ТОҶИКИСТОН: аз бунёди низоми мустақили бонкӣ то бонкдории рақамӣ
РУШДИ САНОАТ. Дар давраи Истиқлолияти давлатӣ Душанбе ба маркази воқеии саноат, савдо ва хизматрасонӣ табдил ёфт
Эмомалӣ Раҳмон: «Бо саҳми соҳибкорони ватандӯст ва шахсони саховатпеша зиёда аз 10 ҳазор километр роҳҳои маҳаллӣ навсозӣ гардида, 273 пул бунёд гардид»
ҚУРБИ АСЪОР: 1 рубли русӣ аз 0.1020 то 0.1068 сомонӣ муқррар шудааст
Ҷамшед Ҷумахонзода: «Соҳаи сайёҳӣ ба яке аз самтҳои афзалиятноки рушди иқтисоди Тоҷикистон табдил ёфтааст»
Абдураҳмон Абдураҳмонзода: «Тоҷикистон дар солҳои соҳибистиқлолӣ чун давлати дорои суръати баланди рушди иқтисодӣ шинохта шуд»
Дар «Саноатсодиротбонк» 35-солагии Истиқлоли давлатӣ таҷлил гардид
Истифодаи технологияҳои муосир ва зеҳни сунъӣ самти афзалиятноки сиёсати давлатии Тоҷикистон мебошад
Кормандони «Саноатсодиротбонк» бо мукофотҳои давлатӣ сарфароз гардиданд
Истиқлол ва рушди саноат: аз сарвати табиӣ то неруи созанда
