БОРИ АВВАЛ ДАР ТОҶИКИСТОН. Фестивали намоиш-фурӯши картошка ва тайёр намудани хӯрокҳо аз он доир мешавад

ДУШАНБЕ, 21.11.2022 /АМИТ «Ховар»/. 26 ноябр дар бозори «Меҳргон»-и шаҳри Душанбе бори аввал «Фестивали намоиш-фурӯши картошка ва тайёр намудани хӯрокҳо аз он» баргузор мегардад, иттилоъ доданд ба АМИТ «Ховар» дар маркази матбуоти Вазорати кишоварзии мамлакат.

Дар фестивали мазкур хоҷагиҳои картошкапарварии мамлакат навъҳои беҳтарини картошкаи худро пешниҳоди сокинон ва меҳмонони пойтахт мегардонанд.

Инчунин дар ин рӯз хони тоҷикӣ бо навъҳои гуногуни хӯрокҳо аз картошка омода ва ороста мешавад.

Бояд гуфт, ки Сарвари давлат Эмомалӣ Раҳмон 14-16 ноябри соли равон зимни сафари корӣ ба вилояти Суғд доир ба баргузории «Фестивали намоиш-фурӯши картошка ва тайёр намудани хӯрокҳо аз он» дастур доданд. Вазорати кишоварзии мамлакат фестивали мазкурро ҷиҳати иҷрои саривақтии дастури Пешвои миллат доир менамояд.

Тибқи маълумоти Вазорати кишоварзӣ, соли равон дар майдони 32,1 ҳазор гектар картошка кишт шудааст. Ҳосили умумии картошкаи ҷамъоваришуда, то 18 ноябри соли равон дар хоҷагиҳои деҳқони ва ҷамоавӣ 821 340 тоннаро ташкил медиҳад, ки нисбат ба соли 2021 185 ҳазору 181 тонна зиёд аст.

АКС: Хадамоти матбуоти Президенти ҶТ/АМИТ «Ховар»