Дар Анқара Рӯзи Конститутсия ва 30-юмин солгарди баргузории Иҷлосияи XVI Шӯрои Олии Тоҷикистон таҷлил гардид

ДУШАНБЕ, 06.11.2022 /АМИТ «Ховар»/. Дар Сафорати Ҷумҳурии Тоҷикистон дар Ҷумҳурии Туркия 5 ноябр бахшида ба Рӯзи Конститутсия ва 30-юмин солгарди Иҷлосияи XVI Шӯрои Олии Ҷумҳурии Тоҷикистон бо иштироки беш аз 100 нафар донишҷӯён ва ҳамватанони муқими Туркия маросими тантанавӣ баргузор гардид. Дар ин бора ба АМИТ «Ховар» дар Сафорати Тоҷикистон дар Анқара хабар доданд. 

Дар суханронӣ Сафири Фавқулода ва Мухтори Ҷумҳурии Тоҷикистон дар Ҷумҳурии Туркия Ашрафҷон Гулов ҳозиринро бо нақши рӯйдодҳои таърихии зикргардида дар пойдории давлати соҳибистиқлоли тоҷикон, инчунин бо хизматҳои шоистаи Президенти Ҷумҳурии Тоҷикистон муҳтарам Эмомалӣ Раҳмон дар рушди ватани маҳбубамон шинос карданд.

Роҳбари намояндагӣ аз суханрониҳои Асосгузори сулҳу ваҳдати миллӣ-Пешвои миллат муҳтарам Эмомалӣ Раҳмон иқтибос оварда, зикр кард, ки «ҳадафи мо аз ҳамасола ҷашн гирифтани рӯзи қабули нахустин Конститутсияи Тоҷикистони соҳибистиқлол, пеш аз ҳама, эҳтирому арҷ гузоштан ба қонуни асосиву сарнавиштсози давлат ва раъйи ҳамватанони азизамон мебошад, ки дар давраи басо душвори таърихӣ онро ҷонибдорӣ намуда, ба ин васила барои ояндаи дурахшони кишварамон заминаи боэътимоди сиёсӣ ва иҷтимоиву ҳуқуқӣ фароҳам оварданд».

Дар ҳошияи чорабинии мазкур мусоҳибаи сафир бо ВАО-и кишвари иқомат, аз қабили Агентии «Иҳлас Ҳабер» роҷеъ ба ҷашнҳои болозикр сурат гирифт.

 АКС: Сафорати ҶТ дар Туркия