Дар мақомоти Ваколатдор оид ба ҳуқуқи инсон бахшида ба Рӯзи Конститутсия ҷамъомад баргузор гардид

ДУШАНБЕ, 05.11.2022. /АМИТ «Ховар»/. 3 ноябр дар мақомоти Ваколатдор оид ба ҳуқуқи инсон ба муносибати Рӯзи Конститутсияи Ҷумҳурии Тоҷикистон ҳамоиш баргузор гардид. Дар ин бора ба мухбири АМИТ «Ховар» дар хадамоти матбуоти Ваколатдор оид ба ҳуқуқи инсон дар Ҷумҳурии Тоҷикистон хабар доданд.

Ваколатдор оид ба ҳуқуқи инсон дар Чумҳурии Тоҷикистон Умед Бобозода иброз дошт, ки «бисту ҳашт сол муқаддам дар кишвари мо тавассути раъйпурсии умумихалқӣ нахустин Конститутсияи Тоҷикистони соҳибистиқлол қабул гардид. Бузургӣ ва аҳамияти ин санади муҳими таърихӣ, пеш аз ҳама, дар он ифода меёбад, ки он бори нахуст аз ҷониби халқ ва барои халқ бо роҳи ифодаи озодонаи майлу иродаи шаҳрвандони Ҷумҳурии Тоҷикистон қабул карда шудааст”.

Муовини сардори шуъбаи ҳифзи давлатии ҳуқуқҳои сиёсӣ ва шаҳрвандии дастгоҳи Ваколатдор оид ба ҳуқуқи инсон Ҳусниддин Нидоев дар мавзӯи «Конститутсияи Ҷумҳурии Тоҷикистон -ҳомии ҳуқуқу озодиҳои инсон ва шаҳрванд» маърӯза намуд. Мавсуф зикр намуд, ки маҳз ҳамин санаи таърихӣ оғози низоми нави давлату давлатдорӣ, поягузори муносибатҳои ҷадиди иқтисодӣ, иҷтимоӣ, фарҳангӣ ва сиёсии кишварамон гардид.

Миллати тоҷик тавонист, ки таҳти роҳбарии Президенти Ҷумҳурии Тоҷикистон муҳтарам Эмомалӣ Раҳмон тавассути дар амал роҳандозӣ намудани меъёрҳои Конститутсия ҷомеаи адолатпарвар бунёд намояд ва дар фазои сулҳу оромӣ, суботи сиёсӣ, ваҳдати миллӣ ва пойдориву созандагӣ устувор бошад.

АКС: Хадамоти матбуоти Ваколатдор оид ба ҳуқуқи инсон дар ҶТ