Дар Суғд бахшида ба Рӯзи Конститутсия ҳамоиши идона доир шуд

Ноябрь 4, 2022 10:00

ДУШАНБЕ, 04.11.2022 /АМИТ «Ховар»/.  3 ноябр бахшида ба Рӯзи Конститутсияи Ҷумҳурии Тоҷикистон дар Кохи фарҳанги ба номи Абӯабдуллоҳи Рӯдакии вилояти Суғд ҳамоиши идона баргузор гардид. 

Тавре АМИТ «Ховар» бо истинод ба Хадамоти матбуоти Раиси вилояти Суғд хабар медиҳад, дар ҳамоиш роҳбарияти вилоят, роҳбарони мақомоти ҳифзи ҳуқуқ, кормандони ташкилоту идораҳо, фаъолону намояндагони ташкилоти ҷамъиятӣ ва воситаҳои ахбори омма иштирок намуданд.

Раиси вилоят  Раҷаббой Аҳмадзода иброз дошт, ки 28 сол муқаддам мардуми Тоҷикистон бо роҳнамоиҳои дурандешонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо қабули Конститутсия барои ташаккули давлати демократӣ, дунявӣ ва ҳуқуқбунёд заминаи боэътимод гузошта, роҳи минбаъдаи рушди ҷомеаи кишварро дар ҷодаи бунёди ҷомеаи шаҳрвандӣ муайян намуданд.

«Чун ба таърихи қабул гардидани Конститутсияи мамлакат нигарем, он дар давраи басо вазнини таърихӣ тариқи раъйпурсии умумихалқӣ қабул гардид. Дар фазои озодбаёнӣ беш аз 87 фоиз ба ҷонибдории Конститутсия, яъне ба тарафдории давлати демократӣ ва ҳуқуқбунёду дунявӣ, интихоби тақдири ояндаи ободу осудаи кишвар раъй доданд»,-зикр кард Раиси вилоят.

Давоми зиёда аз ду моҳи муҳокимаи лоиҳаи Конститутсия ба Шӯрои Олӣ зиёда аз ҳаштуним ҳазор пешниҳод ворид гардида, лоиҳаи Конститутсия танҳо баъди ба эътибор гирифтани пешниҳоди мардум такмил дода, ба раъйпурсии умумихалқӣ бароварда шуд. Тавре Пешвои миллат зикр доштаанд, он воқеан ҳам ба Конститутсияи халқӣ табдил ёфт. Қабули Конститутсия рамзи ҳастии миллат, эҳёи давлати соҳибистиқлоли соҳибтамаддун, исботи интихоби роҳи дурусти давлатдорӣ, тантанаи адолат, татбиқи муваффақонаи андешаи созандаи миллӣ ва шаҳодати саодатмандии халқи Тоҷикистон маҳсуб мешавад.


Туфайли ин санади муқаддас ва тақдирсоз халқи Тоҷикистон худро ҷузъи ҷудонашавандаи ҷомеаи ҷаҳонӣ, пуштибони соҳибихтиёрии давлати худ, эҳтиромгузори ҳуқуқу озодиҳои шахс ва истиқлоли давлатҳои ҷаҳон, таҳкимбахши дӯстии тамоми халқияту миллатҳо ва бунёдгари ҷомеаи адолатпарвар эълон доштанд.

Бо ҳидояту раҳнамоиҳои Пешвои миллат муҳтарам Эмомалӣ Раҳмон халқи шарифи тоҷик аз нахустин рӯзҳои истиқлолият дар раванди барқарорсозӣ ва ташаккули пояҳои давлату давлатдории навин, таъмини амнияту оромии ҷомеа, суботи сиёсиву иқтисодӣ ва иҷтимоии кишвар саъю талоши бесобиқа анҷом дода, ба хотири ободии Ватан корҳои бузурги созандагӣ ва ободониро амалӣ намуданд.

Қабули Конститутсия барои ҳифзи истиқлолият, аз оташи ҷанги таҳмилии шаҳрвандӣ берун овардани ҷомеа, барқарор намудани фаъолияти сохторҳои фалаҷшудаи давлатӣ, таъмин намудани амнияти миллӣ, тартиботи ҷамъиятӣ, ба Ватан баргардонидани гурезаҳо, инчунин ҷиҳати мустаҳкам кардани заминаҳои сиёсиву иҷтимоӣ, иқтисодӣ ва фарҳангии давлат шароити мусоиди ҳуқуқӣ  фароҳам овард.

Президенти мамлакат муҳтарам Эмомалӣ Раҳмон барҳақ таъкид намудаанд, ки халқи тоҷик бо роҳи ифодаи озодонаи мавқеи худ аввалин маротиба имконияти таърихии қабули бевоситаи ин ҳуҷҷати бунёдии сиёсиро бо азму иродаи хеш амалӣ намуда, ба эъмори пойдевори ҳуқуқии давлати мустақили демократӣ ва дунявии Тоҷикистон асоси мустаҳкам гузошт.

Бо қабули Конститутсия дар инкишофи давлатдории Тоҷикистон марҳалаи нави таърихӣ оғоз гардид ва он мардуми кишварро ба созандагиву бунёдкорӣ, дигаргуниҳои азими иқтисодиву иҷтимоӣ ва фарҳангӣ роҳнамоӣ кард.

Конститутсияи Ҷумҳурии Тоҷикистон дорои аҳамияти байналмилалӣ низ мебошад. Ба шарофати арзишҳои асосии конститутсионии он миллати тоҷикро дар арсаи ҷаҳон шинохтаву эътироф намуданд.

Таъкид гардид, ки дар марҳалаи кунунӣ вазифаи ҷонӣ ва қарзи шаҳрвандии ҳар фарди бонангу номус, худогоҳу худшинос ва ватандӯсту ватанпараст он аст, ки дар заминаи Конститутсияи Ҷумҳурии Тоҷикистон дар таҳкими ваҳдати миллӣ, ҳифзи муқаддасоти миллӣ ва пос доштани арзишҳои бузурги ватандорӣ, бахусус неъмати муқаддаси Истиқлолияти давлатӣ ҳамеша талош намояд.

Сипас, аз ҷониби аҳли ҳунару санъат барномаи рангини фарҳангӣ пешниҳод гардид.

АКС: Хадамоти матбуоти Раиси вилояти Суғд

Ноябрь 4, 2022 10:00

Хабарҳои дигари ин бахш

ИҶЛОСИЯИ XVI – ЗАМИНАИ ТАЪРИХИИ ТАҲКИМИ ДАВЛАТДОРӢ, ҚОНУНИЯТ ВА АДОЛАТИ СУДӢ. Андешаҳо дар ин маврид
‎Дар Норак осоишгоҳи Вазорати корҳои дохилӣ ифтитоҳ гардид
АЗ НАСБИ ПАНЕЛҲОИ ОФТОБӢ ТО ЗАХИРАИ СӮЗИШВОРӢ. Муассисаҳои тандурустии Тоҷикистон ба зимистони солҳои 2026–2027 омода мебошанд
Дар Бохтар бахшида ба Иҷлосияи XVI Шурои Олӣ конференсияи ҳизбӣ баргузор шуд
Дар Душанбе Форуми байналмилалии тандурустӣ-2026 баргузор гардид
Ташаббусҳои Тоҷикистон дар соҳаи зеҳни сунъӣ дар Шанхай муаррифӣ карда шуданд
Дар ноҳияи Ёвон бахшида ба Рӯзи Президент ҳамоиши сиёсӣ-фарҳангӣ доир гардид
Ба муносибати 35-солагии муносибатҳои дипломатии Тоҷикистону Чин конфронси байналмилалӣ доир шуд
Дар Тоҷикистон рақамикунонии низоми нафақа тақвият меёбад
Дар Кӯлоб бахшида ба Рӯзи Президент конференсияи илмӣ-амалӣ баргузор шуд
Муовини Сарвазири Тоҷикистон ба ифтихори Рӯзи Президент дар Академияи идоракунии давлатӣ ҳафтаи ҷашниро ифтитоҳ намуд
ПРЕЗИДЕНТ — РАМЗИ ВАҲДАТ, СУБОТ ВА ДАВЛАТДОРИИ МИЛЛӢ. Дар ноҳияи Фирдавсӣ ҳамоиши сиёсиву фарҳангӣ баргузор шуд