Муайян гардид, ки аз аввали соли 2022 чанд нафар шаҳрвандони Россия аз Тоҷикистон дидан кардаанд

ДУШАНБЕ, 08.11.2022 /АМИТ «Ховар»/. Аз моҳи январ то сентябри соли 2022 аз Тоҷикистон беш аз 870,7 ҳазор нафар хориҷиён дидан кардаанд, хабар медиҳад Агентии омори назди Президенти Ҷумҳурии Тоҷикистон. Ин рақам дар муқоиса нисбат ба соли гузашта, ки 526,7 ҳазор нафар шаҳрвандони хориҷӣ вориди кишвар шуда буданд, 2,5 баробар бештар аст.

Аз 870,7 ҳазор нафар беш аз 685,3 ҳазор нафарашон сайёҳ ҳисобида мешаванд. Давоми сол ин нишондиҳанда 3,7 баробар афзудааст.

Бештари шаҳрвандони хориҷӣ ба Тоҷикистон аз Узбекистон, Россия ва Қазоқистон ворид шудаанд.

Таносуби шумора дар маълумот ба таври зерин тақсимбандӣ гардидааст:

— шаҳрвандони Узбекистон — 575,1 ҳазор нафар (66 фоиз аз шумораи умумӣ);

— шаҳрвандони Россия — 225 ҳазор нафар (25,8 фоиз);

— шаҳрвандони Қазоқистон — 18 ҳазор нафар (2,1 фоиз).

Инчунин аз аввали соли 2022 шаҳрвандони ИМА ба Тоҷикистон – 5,4 ҳазор нафар (0,6 фоиз), Туркия – 5,2 ҳазор нафар (0,6 фоиз), Қирғизистон – 3,5 ҳазор нафар (0,4 фоиз), Афғонистон – 2,5 ҳазор нафар ( 0,3 фоиз) ва шаҳрвандони дигар давлатҳо ворид шудаанд.

Фирӯза ДАВЛАТЗОДА,
АМИТ «Ховар»

АКС аз манбаъҳои боз