Рӯзҳои фарҳанги Тоҷикистон дар Туркманистон ҷараён доранд
ДУШАНБЕ, 25.11.2022 /АМИТ «Ховар»/. 23 ноябр дар шаҳри Ашқобод дар толори Кохи мукамҳои Маркази фарҳангии давлатии Туркманистон маросими ифтитоҳи Рӯзҳои фарҳанги Ҷумҳурии Тоҷикистон бо тантана ва шаҳомати хос баргузор шуд. Дар ин бора ба АМИТ «Ховар» дар Сафорати Тоҷикистон дар Туркманистон хабар доданд.
Рӯзҳои фарҳангро Вазири фарҳанги Ҷумҳурии Тоҷикистон Зулфия Давлатзода ва Вазири фарҳанги Туркманистон Атагелдӣ Шамурадов бо суханҳои шодбошӣ ифтитоҳ карданд.
Сипас консерти бошукӯҳи устодони санъати Тоҷикистон оғоз шуд, ки дар он лауреатҳои озмунҳои байналмилалӣ, ҳунармандони мардумӣ ва хизматнишондода, сарояндаҳои маъруфи эстрадӣ, инчунин навозандагон ширкат доштанд.


Дар барномаи консертӣ ҳамчунин санъати рангоранги дастаҳои рақсии маъруфи Тоҷикистон «Лола», «Парасту» ва намоиши гурӯҳи балет, ки ба аҳли ҷомеа композитсияҳои хореографии оташангези худро пешкаш намуд, дохил буданд.
Ҷолиби диққати шаби мусиқӣ баромади сарояндагони овозадори Тоҷикистон ва ансамбли навозандагони машҳури халқ буд, ки бо санъти волои худ табъи ҳозиронро болида сохтанд.
Намоиши мӯди “Либосҳои рангоранг” ба тамошобинон фараҳи зиёде бахшид, ки дар он намунаҳои либосҳои бо услуби миллӣ дӯхташуда аз коллексияи тарроҳи маъруфи тоҷик Хуршед Сатторов ба маъраз гузошта шуд.
Дар ҳошияи Рӯзҳои фарҳанги Тоҷикистон дар Маркази синамои Ашқобод мулоқоти синамогарони ду кишвар ва намоиши филмҳои коргардонҳои тоҷик, филми бадеии «Туъмаи охирини шикорчӣ»-и коргардон Муҳаммадрабӣ Исмоилов ва филми бадеии «Рақси ҳаёт»-и Муҳаббат Сатторова баргузор шуд.
Инчунин дар Осорхонаи санъати тасвирии Ашқобод бахшида ба анъанаҳои фарҳангии Тоҷикистон намоишгоҳи бошукӯҳ ифтитоҳ шуд. Дар намоишгоҳ гавҳарҳои гаронбаҳо, асбоби мусиқии миллӣ, маснуоти чӯбӣ, гулдӯзии тоқиҳои тоҷикӣ ва маҳсулоти гуногуни дастӣ ба намоиш гузошта шуданд.
Дар намоишгоҳ инчунин осори рассомон ва ҳунармандони тоҷик, аксҳо ва беҳтарин маҳсулоти нашриёт, ки таъриху фарҳанги Тоҷикистонро муаррифӣ мекунанд, пешкаш шудаанд.
Дар намоиш намояндагони ҳукумати Туркманистон, вазорату идораҳо, аҳли ҷомеа, роҳбарон ва намояндагони намояндагиҳои дипломатии муқими Ашқобод, воситаҳои ахбори омма, устодони санъат, устодону донишҷӯёни донишгоҳҳои тахассусӣ иштирок намуданд.
Рӯзҳои фарҳанги Тоҷикистон имрӯз, 25 ноябр дар шаҳри Мари бо баргузории консерти калони дӯстӣ дар Театри давлатии драмавии вилоятӣ ба номи Кемине хотима меёбанд. Дар он ҳунармандон ва устодони фарҳанги Тоҷикистон ва Туркманистон ширкат меварзанд.
АКС: Сафорати Тоҷикистон дар Туркманистон












Беҳтарин китобҳои тозанашри Тоҷикистон дар намоишгоҳи байналмилалӣ пешниҳод гардид
Дар Қазон масъалаи баргузории Рӯзҳои фарҳанги Тоҷикистон дар Тотористон баррасӣ гардид
Доир ба саҳми таърихии Борбади Марвазӣ конфронси байналмилалӣ баргузор мешавад
«ДОИРАБАЗМ». Дар Душанбе даври ниҳоии Озмуни ҷумҳуриявии созҳои зарбӣ баргузор мешавад
Нахустнамоиши филми муштараки Тоҷикистону Узбекистон «Дурахши ахтарон: Ҷомӣ ва Навоӣ» баргузор шуд
«ДОСТОНИ ДУШАНБЕ». Китоби нави Шоири халқии Тоҷикистон Давлат Сафар рӯнамоӣ гардид
Дар Файзобод нимпайкараи шоири муосири тоҷик Бозор Собир гузошта шуд
Беҳтарин асарҳои назмию насрӣ дар соли 2026 муайян мегарданд
«ДАР ЧЕҲРААШ НУРИ ХУДО ДОРАД». Таҳти ин унвон бахшида ба Рӯзи Президент намоиши асарҳо баргузор шуд
Дар Душанбе Форуми байналмилалӣ ва намоиши либосҳои миллӣ баргузор гардид
Дар Душанбе маҳфили эҷодии Шоири халқии Тоҷикистон Давлат Сафар баргузор мегардад
Дар кинотеатри «Ватан» нахустнамоиши филми муштараки «Дурахши ахтарон: Ҷомӣ ва Навоӣ» баргузор мешавад






