Соҳибкорони тоҷик дар Намоишгоҳи байналмилалии «India Stonemart-2022» иштирок намуданд

ДУШАНБЕ, 11.11.2022 /АМИТ «Ховар»/. 10 ноябр дар шаҳри Ҷайпури Ҷумҳурии Ҳиндустон Намоишгоҳи байналмилалии саноати санг «India Stonemart-2022»  бо ташаббуси Маркази рушди сангҳо (CDOS) дар ҳамкорӣ бо Иттиҳоди давлатии рушди саноат ва сармоягузории иёлоти Раҷастон (RIICO) ва Федератсияи палатаҳои савдо ва саноати Ҳиндустон расман ифтитоҳ гардид. Дар ин бора ба АМИТ «Ховар» дар Палатаи савдо ва саноати кишвар хабар доданд.

Бо мусоидати Палатаи савдо ва саноати Тоҷикистон дар ҳамкорӣ бо Сафорати Ҷумҳурии Тоҷикистон дар Ҷумҳурии Ҳиндустон корхонаҳои истеҳсолӣ, соҳибкорони инфиродӣ, аъзои  Палатаи савдо ва саноат, ҶДММ «Хорои Хуҷанд», ҶДММ «Санги Сомон» ва ҶДММ «Са-рэй», ки дар самти коркарди сангҳои ороишӣ фаъолият мебаранд, дар маросими ифтитоҳи намоишгоҳ иштирок намуданд. Онҳо  бо ширкатҳои ҷумҳуриҳои Хиндустон ва дигар иштиркчиёни намоишгоҳ вохӯриҳо гузаронида, дар форуму сенминарҳо иштирок менамоянд.

Иштирок дар ин намоишгоҳ ба соҳибкорони ватанӣ имконият медиҳад, ки таҷрибаи кишварҳои пешрафтаро омӯзанд,  шарикони ҳамкор дарёфт намоянд ва барои ташкили корхонаҳои муштарак шартномаҳои ҳамкорӣ ба имзо расонида, содироти маҳсулотро ба хориҷа ба роҳ монанд.

Намоишгоҳи  байналмилалии «India Stonemart-2022» дар шаҳри Ҷайпур то 13 ноябр идома меёбад.

Акс: ПСС ҶТ