«ЗАБОНИ МИЛЛАТ – ҲАСТИИ МИЛЛАТ». Мутарҷимони китоби Президенти Тоҷикистон қадрдонӣ шуданд

Ноябрь 13, 2022 09:41

ДУШАНБЕ, 13.11.2022 /АМИТ «Ховар»/. 10 ноябр як гурӯҳ омӯзгорон барои тарҷума намудани китоби «Забони миллат – ҳастии миллат» — и Пешвои миллат муҳтарам Эмомалӣ Раҳмон бо забонҳои русӣ, англисӣ ва чинӣ бахшида ба 30-юмин солгарди Иҷлосияи XVI Шӯрои Олии Ҷумҳурии Тоҷикистон аз ҷониби роҳбарияти Донишкадаи давлатии забонҳои Тоҷикистон (ДДЗТ) ба номи Сотим Улуғзода бо сипоснома ва мукофотпулӣ қадрдонӣ гардиданд. Дар ин бора ба АМИТ «Ховар» дар ДДЗТ хабар доданд.

Мавриди зикр аст, ки чанде қабл бо ташаббуси Раёсати Донишкада китоби дуҷилдаи «Забони миллат – ҳастии миллат»-и Президенти Ҷумҳурии Тоҷикистон муҳтарам Эмомалӣ Раҳмон бо забонҳои маъруфи ҷаҳон – русӣ, англисӣ ва чинӣ тарҷума гардид, то муаррифи забони ғановатбору хушоҳанги мо дар арсаи ҷаҳонӣ бошад.

Барои тарҷумаи босифату шоистаи китоби «Забони миллат – ҳастии миллат» бо роҳбарии ректори Донишкада, профессор Жило Гулназарзода устодони варзида- Фаёз Турсунов, Бахтиёр Ҳоҷатов, Анвар Баротов бо забони русӣ, Зубайдулло Мусоямов, Бобоҷон Маликов, Муҳаммадсалим Азизмуродов, Ҳамида Ишратова, Зулола Ҳалимзода, Ҷамила Ҷӯраева, Дилфӯза Саидова, Аюб Зикруллоев, Рухангез Сафарзода бо забони англисӣ, Зоир Ғафуров, Манижа Носирова, Қурбонбегим Ғуломалиева, Сайёра Гиёева, Наврӯзмоҳ Муборакшоева ва Моҳбегим Иброҳимова бо забони чинӣ бо камоли муҳаббату садоқат кӯшиш ба харҷ доданд.

Тазаккур бояд дод, ки китоби «Забони миллат – ҳастии миллат» воқеан ҳам дар ҳамбастагӣ ба ифтихори миллӣ ва эҳтиром ба забони модарӣ навишта шудааст. Аз ин ҷост, ки он зуд мақбули ҳамагон ва барои аҳли кишвар ифтихорафзо гардид. Ин китоб бори дигар бо далелҳои муътамад ва суханони баланду дилписанд бузургию тавоноӣ ва таърихи пуршарафи забони модарии моро собит сохт.

АКС: Донишкадаи давлатии забонҳои Тоҷикистон

 

Ноябрь 13, 2022 09:41

Хабарҳои дигари ин бахш

Шоҳҷоизаи Синамоҷашнвораи дуюми байналмилалии «Тоҷи Сомон»-ро коргардони тоҷик Муҳиддин Музаффар соҳиб шуд
«КИТОБИ ДУШАНБЕ». Пагоҳ дар Душанбе намоиши сенздаҳуми байналмилалӣ оғоз мегардад
Эмомалӣ Раҳмон: «Таҷлили Меҳргон далели эҳтиром ба фарҳанги қадима ва суннатҳои созандаи миллати тоҷик аст»
Имрӯз дар Фестивали «Оши палов» намудҳои гуногуни ин таоми миллӣ омода карда шуданд
СЕБҲОИ ТОҶИКИСТОН БО ТАМЪИ ЛАЗИЗАШОН МАШҲУРАНД. Дар Душанбе Иди себ ва ангур таҷлил гардид
Дар Душанбе Иди Меҳргон ба таври тантанавӣ таҷлил гардид
Имрӯз ҷашни Меҳргон бо баргузории Фестивал-намоиши маҳсулот ва техникаи кишоварзӣ оғоз мегардад
Даври ҷамъбастии Фестивал-озмуни ҷумҳуриявии телевизионии эҷодиёти халқ «Андалеб-2025» баргузор мегардад
Сокинони ноҳияи Муъминобод соҳиби туҳфаи арзишманди Пешвои миллат — «Шоҳнома» мегарданд
МЕҲРГОН ОМАД, МУБОРАК, МЕҲРГОН ОМАД! Пагоҳ дар Душанбе Иди Меҳргон бо шукуҳу шаҳомати хосса таҷлил мегардад
СИТОРАИ ТОБНОК ДАР САМОИ СИНАМО. Офаридаҳои баландмазмун ба Бахтиёр Худойназаров шуҳрати ҷаҳонӣ бахшид
Коргардон Аҳмад Аминӣ: «Эрониҳо Тоҷикистонро дӯст медоранду орзуи тамошои манзараҳои нотакрори онро доранд»