Академияи идоракунии давлатии Тоҷикистон ва Донишгоҳи давлатии ҳуқуқшиносии Москва созишномаи ҳамкорӣ ба имзо расониданд

ДУШАНБЕ, 04.12.2022 /АМИТ «Ховар»/. Миёни Академияи идоракунии давлатии назди Президенти Ҷумҳурии Тоҷикистон ва Донишгоҳи давлатии ҳуқуқшиносии Москва ба номи О. Кутафини Россия созишномаи ҳамкорӣ ба имзо расид. Дар ин бора ба АМИТ «Ховар» дар Академияи идоракунии давлатии Тоҷикистон хабар доданд.

Маросими имзои созишнома бо иштироки ректори Донишгоҳи давлатии ҳуқуқшиносии Москва — Виктор Блажеев ва Ректори Академияи идоракунии давлатии назди Президенти Ҷумҳурии Тоҷикистон Абдухалил Ғафурзода баргузор гардид.

Зимни вохӯрӣ ҷонибҳо омодагии худро барои ба роҳ мондани ҳамкории мутақобилаи судманд дар самти табодули донишҷӯён ва омӯзгорон, татбиқи барномаҳои муштараки таълимӣ, амалӣ намудани лоиҳаҳои илмӣ — таҳқиқотӣ, баргузории чорабиниҳои муштарак баён намуда, ҳама гуна иқдомҳои тарафайнро қобили дастгирӣ ҳисобиданд.

Дар доираи созишномаи мазкур таҳия ва татбиқи барномаҳои муштараки таълимӣ-омӯзишӣ оид ба тайёркунӣ, азнавтайёркунӣ, такмили ихтисос ва таҷрибаомӯзии хизматчиёни давлатӣ, гузаронидани маърӯза-семинарҳо бо ҷалби коршиносони байналмилалӣ доир ба масъалаҳои мубрам, таҳқиқоти муштарак дар соҳаҳои идоракунии давлатӣ, сиёсати давлатӣ, муносибатҳои байналмилалӣ, ҳуқуқшиносӣ, иқтисодиёт, кори иҷтимоӣ, ташкил намудани коромӯзии дуҷониба барои ҳайати профессорон ва омӯзгорон, кормандони илмӣ ва маъмурӣ, мубодилаи ҳайати профессорон ва омӯзгорон, мубодилаи мақолаҳо ва нашрияҳои илмӣ, ташкили конференсияҳо ва суҳбатҳои «мизи мудаввар» дар назар аст.

АКС: Академияи идоракунии давлатӣ