Кишоварзони Тоҷикистон соли 2022 барои таъмини аҳолӣ бо маводи ғизоӣ саҳми назаррас гузоштанд

ДУШАНБЕ, 23.12.2022 /АМИТ «Ховар»/. «Ман ба кулли мардуми Тоҷикистон, аз ҷумла деҳқонон миннатдорӣ баён мекунам, ки дар соли 2022 барои таъмини аҳолӣ бо маводи ғизоӣ ва таъмини рушди иқтисодиёту иҷтимоиёт саҳми намоён гузоштанд». Ин матлабро имрӯз Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паёми навбатии хеш ба Парлумони мамлакат таъкид намудаанд, хабар медиҳад АМИТ «Ховар».

Сарвари давлат зикр карданд, ки дар Тоҷикистон тавлиди тухм ва гӯшти мурғ афзоиш ёфт ва ба ин далел воридоти он 11 баробар коҳиш ёфтааст. Инчунин дар соли 2022 беш аз 1 миллион тонна картошка ва 1 миллиону 600 ҳазор тонна лӯбиёгиҳо парвариш карда шуданд.

Инчунин Пешвои миллат аз вазъи имрӯзаи ҷаҳон ёдовар шуда, таъкид доштанд, ки ба танқисии шадиди озуқаворӣ дучор гардидани чоряки кишварҳои дунё моро водор месозад, ки ҷиҳати таъмин намудани ҳадафи стратегиамон – ҳифзи амнияти озуқаворӣ тадбирҳои иловагӣ андешем.

Бояд гуфт, ки тайи ду сол аст, ки Сарвари давлат ба кишоварзон дастур медиҳанд, ки «аз як замин аз 1-2 то 3-4 ҳосил рӯёнидан мумкин аст». Кишоварзони мамлакат ин дастурро амалӣ намуда, солҳои охир бо вуҷуди таъсири манфии омилҳои берунӣ, пайи ҳам омадани хушксолӣ ва маҳдудсозии содироти озуқаворӣ аз ҷониби кишварҳои ҷаҳон амнияти озуқаворӣ ва фаровонии бозори дохилиро бо маҳсулоти кишоварзӣ таъмин намуданд.

Аз ҷумла, соли 2022 истеҳсоли ғалладонагиҳо ба 1 миллиону 600 ҳазор тонна, картошка ба 1 миллион ва меваю сабзавот ба 3 миллиону 200 ҳазор тонна расонида шуд.

Дар натиҷа тайи панҷ соли охир суръати рушди солонаи истеҳсоли маҳсулоти кишоварзӣ ба ҳисоби миёна дар сатҳи 7 фоиз нигоҳ дошта шуда, 1,4 баробар афзоиш ёфт.

Истеҳсоли гӯшти паранда дар ин давра 8 баробар зиёд шуда, ҳаҷми воридоти он 11 баробар кам гардид.

Муовини Сарвазири мамлакат Сулаймон Зиëзода зимни баргузории Фестивали картошка зикр дошт, ки «Тоҷикистон то соли 2020 1 млн тонна картошка истеҳсол мекард. Ин рақам соли 2021 ба 1 млн 20 ҳазор тонна расид. Мувофиқи маълумоти пешакӣ, имсол истеҳсоли картошка ба 1 млн 150 ҳазор тонна мерасад, ки он ба таъмини амнияти озуқавории мамлакат таъсири мусбат мерасонад».

Мавсуф зикр намуд, ки дар ҷамъбасти даҳмоҳаи соли 2022 саҳми кишоварзони мамлакат дар ММД зиёда аз 23 фоизро ташкил медиҳад. Соли равон аз хориҷи мамлакат ягон миқдор картошка ворид нашуда, тамоми маҳсулот истеҳсоли ватанӣ мебошад.

АКС аз бойгонии АМИТ «Ховар»