МАСТӢ БА ПАСТӢ МЕБАРАД. Ду нафар сокинони Рашт бинобар одамкушӣ ба муҳлати 20 сол аз озодӣ маҳрум карда шуданд

ДУШАНБЕ, 08.12.2022. /АМИТ «Ховар»/. Ду нафар сокинони ноҳияи Рашт Ф. Ғайратов ва Ҷ. Саидов, ки 2 августи соли равон дар ҳолати мастӣ ба одамкушӣ даст заданд, ба муҳлати 20 сол аз озодӣ маҳрум гардиданд, хабар медиҳад АМИТ «Ховар» бо истинод ба маркази матбуоти Прокуратураи генералии Ҷумҳурии Тоҷикистон.

«Прокуратураи ноҳияи Рашт тафтиши пешакии парвандаи ҷиноятиро нисбат ба Ғайратов Ф.Ш. ва Саидов Ҷ.Н. бо моддаи 104 қисми 2 бандҳои «з, к»-и Кодекси ҷиноятии Ҷумҳурии Тоҷикистон (куштани одам аз ҷониби гурўҳи шахсон ё гурўҳи шахсон бо маслиҳати пешакӣ, гурўҳи муташаккил, иттиҳоди ҷиноятӣ (ташкилоти ҷиноятӣ); куштани одам аз ҳиссиёти авбошӣ. — Тавз. АМИТ «Ховар») ба итмом расонида, ба Суди Олӣ пешниҳод намуд», — таъкид шудааст дар хабари Прокуратураи генералӣ.

Тафтиши пешакӣ муайян кард, ки 2 августи соли 2022, соати 22:00 Ф. Ғайратов ва Ҷ. Саидов дар назди чойхонаи «Болои об»-и Ҷамоати шаҳраки Ғарми ноҳияи Рашт машруботи спиртӣ истеъмол намуда, дар ҳолати сахти мастӣ қарор доштаанд.

Онҳо, бино ба иттилои Прокуратураи генералӣ, шаҳрванд Н. Юлчиевро, ки бо рафиқаш дар наздикии онҳо ба хӯрдани хӯрок ва истеъмоли машруботи спиртӣ машғул буд, дида, ба наздашон даъват мекунанд ва аз ҳиссиёти авбошӣ ӯро бо дасту пой лату кӯб намуда, ба узвҳои ҳаётан муҳими бадан, сару рӯй ва гарданаш ҷароҳатҳои вазнини ҷисмонӣ мерасонанд, ки дар натиҷа охирин дар ҷойи ҳодиса вафот мекунад.

Бо ҳукми коллегияи судӣ оид ба парвандаҳои ҷиноятии Суди Олӣ аз 10 ноябри соли 2022 судшавандагон Ф. Ғайратов ва Ҷ. Саидовро гунаҳгор дониста, ба онҳо ҷазо дар намуди маҳрум сохтан аз озодӣ ба муҳлати 20 сол бо адо намудани ҷазо дар муассисаи ислоҳии низомаш сахт таъйин карда шуд.

АКС аз Прокуратураи генералии ҶТ