МОШИНҲОИ «ТАКСӢ»-И СОЛИ БАРОРИШАШОН ТО 2016 АЗ ХАТИ САЙР БАРОВАРДА МЕШАВАНД? Ба ин суол сардори шуъбаи Бозрасии давлатии автомобилии шаҳри Душанбе посух дод
ДУШАНБЕ, 02.12.2022 /АМИТ «Ховар»/. Имрӯзҳо миёни сокинони пойтахт сару садоҳое паҳн шудаанд, ки гӯё кормандони Бозрасии давлатии автомобилии шаҳр аз хати сайр баровардани мошинҳои соли бароришашон то 2016-ро оғоз намудаанд. Оё ин овозаҳо асоси воқеӣ доранд? Ба ин суоли хабарнигори АМИТ «Ховар» сардори шуъбаи Бозрасии давлатии автомобилии шаҳри Душанбе Бахтиёр Вайсзода посух дод.
Ба гуфтаи Б.Вайсзода, «баровардани мошинҳои соли бароришашон то 2016, ки имрӯз миёни ронандагон ҳар гуна ҳангома ба миён овардааст, асоси воқеӣ надорад. Мо ҳамасола ин гуна чорабиниҳои мақсаднок, ба монанди «Амалиёти пиёдагард», «Амалиёти истгоҳ», «Автобус» ва чанде дигарро ба хотири баланд бардоштани интизом, ҳолати техникӣ, баррасии сатҳи омодагии мошинҳои хурди мусофиркашонӣ ба давраи зимистон мегузаронем. Рақамҳои нақлиёте, ки гирифта мешаванд, баъд аз ислоҳи камбудӣ аз ҷониби ронандагон ба онҳо баргардонида хоҳанд шуд».
Тавре иттилоъ дода шуд, имрӯз дар 12 ҷамъияти хурди мусофирбар 3600 квота муқаррар шудааст. Аммо ин ширкатҳо бинобар афзоиши ҳудуди шаҳри Душанбе аз ҳисоби ноҳияҳои атрофи он 500 адад мошини дигарро барои хизматрасонӣ зам кардаанд. Яъне, теъдод ба 4100 адад расидааст. «Ҳоло шумораи нақлиёти хурди мусофиркашонӣ зиёда аз 6000 ададро ташкил медиҳад.Дар натиҷаи аз ҷониби ширкатҳо худсарона зиёд кардани квота барои хизматрасонӣ ба танбашавӣ ва халалдорёбии кори автобусу троллейбусҳо дар истгоҳҳо оварда мерасонад.
Ҳамсуҳбати мо изҳор дошт, ки таъмини тартибот дар роҳу нақлиёт на танҳо вазифаи кормандони БДА ба шумор меравад, зеро ҷамъиятҳои мусофиркашонӣ кормандоне доранд, ки тартиботи бехатарӣ дар роҳро таъмин мекунанд, аммо аз ҷониби онҳо уҳдадориҳояшон ба таври зарурӣ амалӣ карда намешаванд.
«Ширкатҳо мебояд реҷаи корӣ дошта бошанд. Яъне қисмати реҷаи рӯзона ва шабона. Қабл аз шурӯъ кардан ба кор бояд ҳолати рӯҳиву равонии ронандагон санҷида шавад. Ҳамин аст, ки бинобар сабабҳои болозикр дар 11 моҳи соли равон бо иштироки нақлиёти мусофиркашон 47 ҳодисаи нохуши роҳу нақлиётӣ ба амал омадаанд, ки дар натиҷа 7 нафар ҳалок ва 40 тани дигар ҷароҳатҳои гуногуни ҷисмонӣ бардоштаанд»,-афзуд Б. Вайсзода.
Саволе ба миён меояд, ки агар дар ширкатҳо меъёри муайяни қабули мошинҳои мусофиркаш ҷорӣ гардида бошад, пас чаро онҳо аз меъёр зиёд қабул мекунанд?
Мутаассифона, ҳангоми тамос ҷиҳати посух додан ба ин савол ширкатҳои хизматрасон аз шарҳ худдорӣ намуданд.
Шаҳлои САДРИДДИН,
АМИТ «Ховар»
АКС аз манбаъҳои боз
Ваколатдор оид ба ҳуқуқи инсон дар вохӯрии машваратии ниҳодҳои миллии ҳуқуқи инсони давлатҳои аъзои СҲШ иштирок намуд
Дар Душанбе даври сеюми Форуми марказҳои таҳлилии «Осиёи Марказӣ ва Ҷумҳурии Корея» баргузор гардид
Дар соҳили Сирдарёи шаҳри Хуҷанд шиногоҳи нав ба истифода дода шуд
«ВАҲДАТИ МИЛЛӢ — АСОСИ ШУКУФОИИ ВАТАН». Таҳти ин унвон конференсияи ҷумҳуриявӣ баргузор шуд
Ҷавонони Тоҷикистон дар Форуми 6-уми «Сарварони ҷавони эҷодкори Осиёи Марказӣ ва Русия» иштирок менамоянд
РӮЗИ ХИЗМАТЧИИ ДАВЛАТӢ. Дар Тоҷикистон ташкили ин ниҳод яке аз дастовардҳои давраи соҳибистиқлолӣ мебошад
Байни Тоҷикистон ва Қирғизистон Ёддошти тафоҳум оид ба ҳамкорӣ дар соҳаи ҳуқуқи инсон ба имзо расид
Форуми ҷумҳуриявии «Маърифати ҳуқуқӣ — омили рушди давлати ҳуқуқбунёд» доир мегардад
Душанбе мизбони Форуми марказҳои таҳлилии «Осиёи Марказӣ ва Ҷумҳурии Корея» мегардад
Дар Тоҷикистон дар даҳ сол як маротиба барӯйхатгирии аҳолӣ ва фонди манзил гузаронида мешавад
Дар Ховалинг соҳибкорон аз хонаводаҳои Каримовҳо ва Одинаевҳо барои ятимону маъюбон осоишгоҳ сохтанд
Барои гирифтор нашудани кӯдакон ба бемории дарунравӣ чӣ бояд кард?
