ҶОМИ МЕССИ. Мунтахаби Аргентина маротибаи 3-юм чемпиони ҷаҳон оид ба футбол гардид

ДУШАНБЕ, 19.12.2022 /АМИТ «Ховар»/. Мунтахаби Аргентина дар бозии финалии Чемпионати ҷаҳон оид ба футбол дар Қатар бар Фаронса пирӯз шуд ва баъд аз соли 1986 дар ин мусобиқот ғолиб омад. Вақти асосии вохӯрӣ бо ҳисоби 2:2 ва вақти изофӣ – 3:3 анҷом ёфт. Дар зарбаҳои 11-метра аргентиниҳо бо ҳисоби 4:2 пирӯз шуданд, хабар медиҳад АМИТ «Ховар» бо истинод ба ТАСС.

Дар дақиқаи 23-юм Лионел Месси голро аз зарбаи 11-метра ба самар расонид. Дар дақиқаи 36-ум Анхел Ди Мария ҳисобро 2:0 кард. Муддати тӯлонӣ ҳисоб бетағйир монд, аммо дар дақиқаи 80-ум Килиан Мбаппе аз зарбаи 11 метра гол зада, ҳисобро тағйир дод. Пас аз ду дақиқа Мбаппе ҳисобро 2:2 кард.

Дар вақти иловагӣ Месси ва Мбаппе боз як голии дигар зада, ҳисобро 3 бар 3 намуданд. Дар вақти иҷрои зарбаҳои 11 метра Аргентина ба ғалаба даст ёфт.

Ҳамин тавр, фаронсавиҳо имкони бори дуюм пайиҳам ба унвони чемпиони ҷаҳон даст ёфтандро аз даст доданд. Ба чунин дастовард дар таърихи ЧҶ ду даста муваффақ шуда буданд — Италия (солҳои 1934 ва 1938) ва Бразилия (солҳои 1958 ва 1962).

Мунтахаби Аргентина бори шашум дар финали ЧҶ ширкат меварзад ва ду бор – солҳои 1978 ва 1986 – чемпиони ҷаҳон ва медали тиллои мусобиқотро ба даст оварда буд. Ин маротибаи 3-юм буд, ки аргентиниҳо ҷомро соҳиб шуданд.

Дар рӯйхати беҳтарин нишозанҳои ЧҶ дар Қатар ҳамлагари мунтахаби Фаронса Килиан Мбаппе бо 8 голи задааш дар мақоми аввал аст. Аргентинӣ Лионел Месси 7 гол дар ҳисобаш дорад ва дар мақоми дуюм аст.

Чемпионати ҷаҳон-2022 оид ба футбол дар Қатар охирин мусобиқае буд, ки дар он 32 даста ширкат доштанд. Дар мусобиқаи соли 2026 дар ИМА, Мексика ва Канада 48 даста ширкат мекунанд. Шакли баргузории марҳилаи гурӯҳии мусобиқот баъдан муайян хоҳад шуд. Аз соли 1998 инҷониб 32 даста дар даври финалии мусобиқоти ЧҶ ширкат мекунанд.

АКС: Reuters