РОБОТ-СОХТМОНЧӢ. Донишгоҳи «Иннополис» онро дар ҳудуди Тоҷикистон ва 7 кишвари дигар соҳиби патент намуд

ДУШАНБЕ, 20.12.2022 /АМИТ «Ховар»/. Донишгоҳи «Иннополис» роботи кабелии сохтмончиро дар ҳудуди ҳашт кишвар соҳиби патент намуд. Сохти ин робот барои интиқол осон ва он нисбат ба дигар принтерҳои сохтмонии 3D сабуктар аст, иттилоъ доданд ба ТАСС дар хадамоти матбуоти донишгоҳ.

Зикр карда мешавад, ки махсусияти роботи таҳияшуда- системаи кабелӣ мебошад. «Онро махсус барои майдони муайяни бино танзим кардан шарт нест, танҳо бурҷҳоро бо ғарғараи борбардорие, ки дар он  ноқилҳо ҷойгир карда шудаанд, бояд дар масофаи дилхоҳ гузошт,  омехтаи сохтмониро ба зарф рехта, бузургиҳоро интихоб кард ва раванди чопи 3D-ро бо асбоб  бояд оғоз намуд»,-шарҳ доданд дар хадамоти матбуотӣ.

Дар хадамоти матуботӣ иброз намуданд, ки сохтори робот ҳангоми аз як ҷо ба ҷои дигар бурдан хеле роҳат буда, нисбат ба дигар намуди принтерҳои сохтмонии 3D сабуктар ва барои истифода камхарҷтар мебошад. «Идораи патентии Авруосиё таҳияи Донишгоҳи «Иннополис»-ро  патенти беҳтарин ноябр эътироф намуд», — гуфтанд дар хадамоти матбуотӣ.

Шаҳлои САДРИДДИН,
АМИТ «Ховар»

АКС: хадамоти матбуоти Донишгоҳи «Иннополис»