Ширкати телевизионии «Мир» оид ба ҷараёни навсозии НБО-и «Норак» гузориш дод

ДУШАНБЕ, 20.12.2022 /АМИТ «Ховар»/. Дар яке аз иншооти стратегии Тоҷикистон — Неругоҳи барқи обии «Норак» марҳилаи аввали навсозӣ идома дорад.  Дар неругоҳ таҷҳизотро нав ва ҷойгир мекунанд, хабар медиҳад мухбири «МИР 24».

«Ин ҷо хеле серғавғост, фарш дар зери по меларзад. Агрегатҳо ин гуна кор мекунанд. Онҳо дар як дақиқа 200 маротиба гардиш мекунанд», — нақл кард рӯзноманигор.

Ба гуфтаи ӯ, ҳоло танҳо як агрегат 335 мегаватт неру коркард мекунад. Баъди навсозӣ иқтидори он 12 фоиз меафзояд. Дар зимистони сард ин имкон медиҳад, ки истеъмолкунандагон бо неруи барқи ​​бефосила таъмин шаванд, дар тобистон имкон медиҳад, ки маҳсулоти зиёдатӣ содирот шуда, даромад ба даст ояд.

Навсозӣ асосан ба агрегатҳо дахл дорад, зеро маҳз онҳо обро ба қувваи барқ табдил медиҳанд. Баъзе коргарон қисмҳои дастгоҳи навро васл мекунанд, дигарон таҳкурсии зери онро мустаҳкам менамоянд.

Ба гуфтаи мухбири «МИР-24», кори НБО-и «Норак» бе азнавбарқарорсозӣ метавонад ҳар лаҳза қатъ ёбад, ки ин барои ҷумҳурӣ қобили қабул нест. Зеро маҳз дар ин ҷо беш аз 60 фисади тамоми неруи барқи Тоҷикистон ҳосил карда мешавад. Пас аз он ки ҳама корҳо ба анҷом мерасанд, неругоҳ мақоми худро чун бузургтарин иншооти гидроэнегетикӣ дар Осиёи Марказӣ тасдиқ менамояд.

Шаҳлои САДРИДДИН,
АМИТ «Ховар»

АКС: mir24.tv