Вазири нақлиёти Тоҷикистон бо роҳбарону намояндагони ширкатҳои нақлиётӣ — экспедитсионӣ (логистикӣ) мулоқот кард

ДУШАНБЕ, 10.12.2022 /АМИТ «Ховар»/. Рӯзи чоршанбе, 7 декабр Вазири нақлиёти Тоҷикистон Азим Иброҳим бо роҳбарону намояндагони ширкатҳои нақлиётӣ — экспедитсионӣ (логистикӣ) вохӯрӣ доир намуд, иттилоъ медиҳад хабарнигори АМИТ «Ховар».

Дар ҷаласа масъалаҳои зайл мавриди баррасӣ қарор гирифтанд:

— муҳокимаи пешниҳодоти манзурнамудаи ширкатҳои нақлиётӣ-экспедитсионӣ (логистикӣ);

— мушкилоту имконоти мавҷудаи логистикаи нақлиётӣ, дурнамои нақшаҳои рушди он дар ҳамкорӣ бо ширкатҳои нақлиётӣ-экспедитсионӣ (логистикӣ);

— пешниҳод ва баррасии лоиҳаи “Сохтори низоми логистикаи нақлиётӣ дар Ҷумҳурии Тоҷикистон”.

Азим Иброҳим ҷиҳати бартараф намудани мушкилоти ширкатҳои нақлиётӣ-экспедитсионӣ барои тамос ва фавран андешидани чораҳои дахлдори қонунӣ рақами телефони боварӣ эълон намуд. Таъкид гардид, ки ширкатҳои нақлиётӣ метавонанд дар давоми 24 соат аз рақами ахборотии 2211439 ва 2222277 истифода намоянд.

Инчунин, таъкид гардид, ки барои боз ҳам зич ва беҳтар намудани ҳамкорӣ бо МД “Нақлиёти автомобилӣ ва хизматрасонии логистикӣ” — мақоми ваколатдори вазорат дар соҳаи логистика аз платформаи logistics.tj — и ин муассиса ва ҳамчунин сомонаи расмии Вазорати нақлиёт mintrans.tj маълумоти бештарро дастрас намоянд.

АКС: Вазорати нақлиёти ҶТ