Ҷавонони ватандӯст кафили ояндаи босуботи Тоҷикистонанд

ДУШАНБЕ, 16.01.2023. /АМИТ «Ховар»/. Соли 1993 дар солномаи таърихи Ватани мо барои низомиён соли таърихист, зеро бо ташаббусу ибтикори Пешвои миллат Эмомалӣ Раҳмон Қувваҳои Мусаллаҳи Тоҷикистон таъсис дода шуданд. Чунин иброз гардид зимни вохӯрии намояндагони Кумитаи кор бо ҷавонон ва варзиши назди Ҳукумати Ҷумҳурии Тоҷикистон бо афсарону сарбозони қисми низомии Вазорати корҳои дохилии Ҷумҳурии Тоҷикистон, иттилоъ доданд дар кумитаи мазкур.

Сардори Раёсати кор бо ҷавонони дастгоҳи марказии Кумита Амир Иброҳимзода иброз намуд, ки ҳиссаи Артиши миллӣ дар ҳифзи марзу бум, таъмини амнияти мардум, бунёди давлати демократӣ, ҳуқуқбунёд ва дунявӣ, яъне истиқлолияти давлати тоҷикон ниҳоят бузург аст.

«Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатӣ ба Маҷлиси Олӣ, ки 23 декабри соли 2022 ироа намуданд, аз сокинони кишвар даъват ба амал оварданд, ки бояд ватандӯсту ватанпараст бошанд ва ҳаргиз фаромӯш насозанд, ки эҳсоси гарми ватандӯстӣ ва ҳисси баланди миллӣ омили асоситарин ва роҳи муҳимтарини рушди давлат ва ҷомеа мебошанд. Аз ин хотир мо — ҷавононро зарур аст, ки дар худ ҳисси худшиносӣ дошта бошем ва миллати худро аз ҳама хатарҳо эмин дорем»,- афзуд Амир Иброҳимзода.

Вохӯрии мазкур тибқи нақшаи чорабиниҳои тасдиқгардида бахшида ба 30-солагии Қувваҳои Мусаллаҳи Ҷумҳурии Тоҷикистон ва бо мақсади талқини ҳисси ватандӯстӣ ва таҳкими ҳувияти миллӣ миёни ҷавонон доир гардида, баргузории он дар дигар қисмҳои ҳарбии ҷумҳурӣ идома дорад.

Дар охири ҳамоиш ба як гурӯҳ сарбозону афсарон сипосномаҳо ва туҳфаҳои хотиравӣ тақдим гардиданд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон