Дар мавзеи Қаратоғи ноҳияи Шаҳринав корҳои биотехникӣ гузаронида шуданд

ШАҲРИНАВ, 18.01.2023 /АМИТ «Ховар»/. Ҳамасола дар фасли зимистон бо мақсади эмин ва бе талаф нигоҳ доштани ҳайвоноти ваҳшӣ ва парандагон аз тарафи муассисаҳои давлатии хоҷагиҳои ҷангали Агентии хоҷагии ҷангали назди Ҳукумати Ҷумҳурии Тоҷикистон корҳои биотехникӣ доир шуда, зимни он дар ҷойҳои сукунати ҳайвоноту парандагон хошок, рези гандум, ҷав, шолӣ ва дигар намуди хӯроки чорво гузошта мешаванд. Дар ин бора ба мухбири минтақавии АМИТ «Ховар» Субҳониддини МАҲМУД дар Мақомоти иҷроияи ҳокимияти давлатии ноҳияи Шаҳринав хабар доданд.

Кормандони шуъбаи ҳифзи муҳити зисти ноҳия ва Муассисаи давлатии хоҷагиҳои ҷангал бо мақсади бо хӯрок таъмин намудани ҳайвоноту парандагони нодир дар ин рӯзҳои сарди зимистон зиёда аз 1100 килограмм ҷуворимакка, гандум, ҷав, намак ва хасу хошокро дар мавзеъҳои пурбарфи Қаратоғ гузоштанд.

Корҳои биотехникӣ ҳамчунин дар дигар мавзеъҳои баландкӯҳи ноҳия гузаронида мешаванд.

АКС: Мақомоти иҷроияи ҳокимияти давлатии ноҳияи Шаҳринав