IRS: Дар роҳи Душанбе-Чанок ба ҳаракати мошинҳои боркаш иҷозат дода шуд

ДУШАНБЕ, 04.01.2023. /АМИТ «Ховар»/. Ҳаракати тамоми намуди воситаҳои нақлиёт дар роҳи «Душанбе  — Чанок» таъмин карда шудааст. Дар ин бора ба АМИТ «Ховар» дар маркази матбуоти Филиали «Инновейтив Роуд Солюшнз ЛТД» дар Ҷумҳурии Тоҷикистон хабар доданд.

Ёдовар мешавем, ки шаби гузашта дар роҳи «Душанбе – Чанок» бар асари бориши пуршиддати барф дар чанд қитъа, аз ҷумла дар километри 156 тарма фаромад.

Вобаста ба ҳолати баамаломада гузариши фура ва мошинҳои боркаши ядакдор дар ин роҳ муваққатан маҳдуд гардид.

Аз ҷониби кормандони ширкат доир ба ҳолати мазкур ба таври фаврӣ тадбир андешида шуда,  дар муддати кӯтоҳ  тармаҳо бартараф гардиданд.

Дар айни замон дар масири мазкур ҳаракати нақлиёт пурра иҷозат дода шудааст.

АКС: Филиали «Инновейтив Роуд Солюшнз ЛТД» дар Ҷумҳурии Тоҷикистон