Ташаббусҳои Президенти Тоҷикистон оид ба обу иқлим ба намояндагони беш аз 120 давлат муаррифӣ карда шуданд

Январь 13, 2023 15:57

ДУШАНБЕ, 13.01.2022 /АМИТ «Ховар»/. Ташаббусҳои ҷаҳонии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон оид ба обу иқлим дар нишасти онлайнии «Овози Ҷануби Ҷаҳонӣ»*, ки бо иштироки намояндагони беш аз 120 давлат баргузор гардид, муаррифӣ карда шуданд, хабар медиҳад АМИТ «Ховар» бо истинод ба Кумитаи ҳифзи муҳити зист.

12 январ аз ҷониби Тоҷикистон Раиси Кумитаи мазкур Баҳодур Шерализода дар ҷаласаи нишасти вазирони ҳифзи муҳити зист таҳти унвони «Ба мувозинат овардани рушд бо муҳити зист-тарзи ҳаёти бехатар» ба таври маҷозӣ иштирок намуд.

«Дар давоми панҷ соли охир мо шоҳиди гармшавии бесобиқаи глобалӣ гардидем, ки боиси хушксолӣ ва дигар офатҳои табиӣ дар миқёси ҷаҳон шуд ва ба таъмини амнияти озуқаворию дигар соҳаҳои иқтисодиёти кишварҳои мо таъсири манфӣ расонид, — иброз дошт ӯ. — Аз ҷумла, обшавии барфу пиряхҳо ва яхбандии абадӣ таъсири доимӣ дошта, гармшавии глобалиро метавонад суръат бахшад».

Дар идома номбурда тазаккур дод, ки Тоҷикистон ҳамасола дар натиҷаи офатҳои табиӣ, ки барои давлатҳо дар роҳи расидан ба Ҳадафҳои Рушди Устувор мушкилот эҷод менамоянд ва боиси талафоти ҷонию хисороти зиёд ба инфрасохтори ҳаётан муҳим мегарданд, садҳо миллион доллари ИМА зарар мебинад.

Бино ба гуфтаи Баҳодур Шерализода, масъалаи дигари ин раванд обшавии босуръати пиряхҳо мебошад. Зеро тайи чанд даҳсолаи охир дар Тоҷикистон беш аз ҳазор пирях комилан аз байн рафт. Дар ин замина Ҳукумати Ҷумҳурии Тоҷикистон «Барномаи давлатии омӯзиш ва ҳифзи пиряхҳоро то соли 2030» таҳия ва қабул намуд. Дар ин доира аз ҷониби Кумита ҷиҳати назорати динамикаи обшавии пиряхҳо ва ҷамъоварии маълумоти илмӣ дар назди Агентии обуҳавошиносӣ Маркази пиряхшиносӣ таъсис дода шуд.


Ӯ ба иштирокчиён ёдовар шуд, ки пешниҳоди Президенти Ҷумҳурии Тоҷикистон муҳтарам Эмомалӣ Раҳмон дар бораи «Соли байналмилалии ҳифзи пиряхҳо» эълон кардани соли 2025 аз ҷониби Маҷмаи Умумии Созмони Милали Муттаҳид дастгирӣ ёфт ва 14 декабри соли 2022 Қатънома ба тасвиб расида, 21 март ҳамасола дар сатҳи ҷаҳон ҳамчун «Рӯзи ҷаҳонии пиряхҳо» ҷашн гирифта мешавад.

«Робита байни тағйирёбии иқлим, об, энергетика ва амнияти озуқаворӣ яке аз воситаҳои асосии ҳалли ин мушкилоти мураккаб мебошад. Ин нуқта барои Тоҷикистон махсусан муҳим аст, зеро қариб 80 фисади маҳсулоти кишоварзӣ дар заминҳои обӣ истеҳсол карда шуда, зиёда аз 98 фисади қувваи барқ дар мамлакат аз ҳисоби неругоҳҳои барқии обӣ ҳосил мегардад, — гуфт Раиси Кумита. — Тоҷикистон аз рӯи тавлиди неруи барқи обӣ дар ҷаҳон ҷойи 6-умро ишғол мекунад ва метавонад ҳамчун манбаи «энергияи сабз» барои тамоми минтақа хизмат намояд ва баҳри ноил шудан ба Ҳадафҳои Рушди Устувор саҳми арзанда гузорад».

Ёдовар мешавем, ки нишасти «Овози Ҷануби Ҷаҳонӣ» бо мизбонии Сарвазири Ҷумҳурии Ҳиндустон Нарендра Модӣ 12-13 январ доир гашта, дар доираи он 10 иҷлосия, сессияҳои ибтидоӣ, ҷамъбастӣ ва 8 нишасти вазирони муҳити зисти давлатҳои ҷаҳон баргузор шуд.

________________

* Кишварҳои Африқо, Амрикои Лотинӣ ва ҳавзаи Кариб, ҷазираҳои Уқёнуси Ором, инчунин кишварҳои рӯ ба тараққии Осиёро шартан Ҷануби Ҷаҳонӣ меноманд.

АКС: Кумитаи ҳифзи муҳити зисти назди Ҳукумати ҶТ

Январь 13, 2023 15:57

Хабарҳои дигари ин бахш

Намояндаи Тоҷикистон дар чорабинӣ оид ба маблағгузории миллӣ барои расидан ба Ҳадафҳои Рушди Устувор иштирок намуд
Ҷонибек Ҳикмат дар чорабинӣ бахшида ба Рӯзи байналмилалии «ҷаҳони бе партов» иштирок намуд
Дар қароргоҳи Созмони Милали Муттаҳид бахшида ба таҷлили ҷашни Наврӯзи байналмилалӣ ҳамоиши тантанавӣ доир гашт
Деннис Фрэнсис саҳми Тоҷикистонро дар пешбарии масъалаҳои марбут ба об баланд арзёбӣ намуд
Дар Ню-Йорк аҳаммияти фаъолияти Раванди оби Душанбе баррасӣ гардид
Дар шаҳри Остона ҷашни байналмилалии Наврӯз таҷлил гардид
Вазири корҳои хориҷии Тоҷикистон дар Конфронс ба муносибати Рӯзи ҷаҳонии об иштирок намуд
Тоҷикистон ва Туркия муносибатҳои дуҷонибаро дар самтҳои сиёсӣ, иқтисодӣ ва сармоягузорӣ баррасӣ намуданд
Дар шаҳри Москва Наврӯзи байналмилалиро таҷлил намуданд
Ҷашни байналмилалии Наврӯзро дар Ашқобод бошукуҳ таҷлил намуданд
Дар Берлин ҷашни байналмилалии Наврӯзро таҷлил намуданд
Дар Душанбе фаъолияти Бонки аврупоии таҷдид ва рушд дар Тоҷикистон баррасӣ шуд