Ҳангоми ҳамлаи террористӣ ба идораи полис дар Карочии Покистон ҳафт нафар ҳалок шуданд

ДУШАНБЕ, 20.02.2023 /АМИТ «Ховар»/. Шаби ҷумъа ҳангоми ҳамлаи террористӣ ба идораи сардори полис дар Карочӣ- маркази вилояти Синд дар ҷануби Покистон ҳафт нафар ҳалок шуданд. Тавре АМИТ «Ховар» бо истинод ба «Синхуа» иттилоъ медиҳад, дар ин хусус 18 феврал дар «Твиттер» котиби матбуоти ҳукумати музофотӣ Муртазо Ваҳоб хабар додааст.

Мувофиқи гуфтаи ӯ, неруҳои амниятӣ ҳарсе ҷангҷӯро, ки ба бино ҳамла карданд, нобуд карданд. Илова бар ин, марги се маъмури амниятӣ ва як ғайринизомӣ таъйид шуда, 19 нафари дигар захмӣ шудаанд, ки яке аз онҳо дар ҳолати вазнин қарор дорад.

Ҳамла тақрибан соати 19:10 ба вақти маҳаллӣ ба амал омадааст. Ба гуфтаи ӯ, ҷангӯён аз дарвозаи асосӣ вориди бино шуда, дар ҷараёни ҳамла беш аз 25 норинҷакро истифода кардаанд.

Масъулияти ин ҳамларо созмони «Таҳрики Толибони Покистон», ки дар ин давлат мамнӯъ аст, бар уҳда гирифт. Дар изҳороте, ки шоми ҷумъа нашр шуд, гуфта мешавад, ки ҳадафи ҳамла идораи полиси Карочӣ будааст.

Сарвазири Покистон Шаҳбоз Шариф ин ҳамларо шадидан маҳкум карда, ба полис ва неруҳои амниятӣ барои амалиёти бонатиҷа алайҳи ҷангҷӯён изҳори сипос намуд.

Азиза ДАДАБОЕВА,
АМИТ «Ховар»

АКС аз манбаъҳои боз