Дар даврони соҳибистиқлолии Тоҷикистон дар соҳаи роҳу нақлиёт 54 лоиҳаи давлатии сармоягузорӣ татбиқ гардид

ДУШАНБЕ, 01.02.2023. /АМИТ «Ховар»/. Дар даврони Истиқлоли давлатии Ҷумҳурии Тоҷикистон дар соҳаи роҳу нақлиёти мамлакат 54 лоиҳаи давлатии сармоягузорӣ бо маблағи зиёда аз 1,8 миллиард доллари ШМА татбиқ гардида, дар доираи ин маблағ зиёда аз 2227 км роҳ сохта, ба истифода дода шудааст. Дар ин хусус имрӯз зимни нишасти матбуотӣ Вазири нақлиёти Ҷумҳурии Тоҷикистон Азим Иброҳим ба хабарнигорон иттилоъ дод.

Гуфта шуд, ки дар айни замон дар самти роҳу нақлиёти мамлакат 12 лоиҳаи давлатии сармоягузорӣ ба маблағи умумии 10,7 миллиард сомонӣ амалӣ гардида истодааст. Аз ин 3 лоиҳа ба маблағи 2,97 милиард сомонӣ пурра ба анҷом расида, дар давраи кафолатӣ қарор доранд.

Вазири нақлиёти ҷумҳурӣ иброз дошт, ки соли сипаригардида аз тарафи соҳибкорони ватанӣ ба маблағи 242 миллиону 279,9 ҳазор сомонӣ корҳои таъмиру барқарорсозии роҳҳои мошингард ва иншооти он иҷро гардиданд.

Зарангези ЛАТИФ,
АМИТ «Ховар»

АКС: АМИТ «Ховар»