Дар Хадамоти иҷро бахшида ба 30-юмин солгарди таъсиси Қувваҳои Мусаллаҳи Тоҷикистон ҳамоиши идона доир шуд

ДУШАНБЕ, 23.02.2023 /АМИТ «Ховар»/. Мо ифтихор аз он дорем, ки сарбозону афсарони Қувваҳои Мусаллаҳи Ҷумҳурии Тоҷикистон баҳри пойдорӣ ва амнияту суботи мамлакатамон шабу рўз дар хизмат қарор доранд. Ин нукта зимни баргузории ҳамоиши идона дар Хадамоти иҷрои назди Ҳукумати Ҷумҳурии Тоҷикистон ба ифтихори таҷлили 30-юмин солгарди таъсиси Қувваҳои Мусаллаҳи мамлакат баён гардид, хабар доданд ба АМИТ «Ховар» дар хадамоти мазкур.

Иброз гардид, ки Қувваҳои Мусаллаҳ дар давраи душвори сиёсии мамлакат таъсис ёфта, бо талошҳои пайгиронаи Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар муддати кӯтоҳи таърихӣ ба неруи қудратманди низомӣ, муҳофизи сулҳу субот ва фазои орому осудаи мамлакат табдил ёфта, дар ҳифзи истиқлоли давлатӣ, сохти конститутсионии мамлакат ва ҳимояи марзу буми Ватан саҳми сазовор гузошт.

Тазаккур дода шуд, ки бо талошу ҷоннисориҳои фарзандони бонангу номуси Ватан, яъне афсарону сарбозони Қувваҳои Мусаллаҳ ва кормандони мақомоти ҳифзи ҳуқуқ дар айёми ниҳоят душвор ва барои мардуми мамлакат тақдирсоз сохти конститутсионӣ, сулҳу оромӣ ва суботи сиёсӣ барқарор гардида, барои рушди иқтисодиву иҷтимоии мамлакат шароити мусоид фароҳам оварда шуд.

Зимни ҳамоиш ба як зумра кормандон медали ҷашнии «30-солагии Қувваҳои Мусаллаҳи Ҷумҳурии Тоҷикистон» супорида шуд.

АКС: Хадамоти иҷрои назди Ҳукумати Ҷумҳурии Тоҷикистон