Дар километри 62-юми роҳи Душанбе-Чаноқ тарма фаромада, ҳаракати нақлиёт маҳдуд карда шуд

ДУШАНБЕ, 07.02.2023 /АМИТ«Ховар»/. Дар километри 62 — юми роҳи Душанбе-Чаноқ тарма фаромад. Вобаста ба ин  ҳаракати нақлиёт маҳдуд гардида, оқибатҳои  тарма бартараф  карда мешавад. Дар ин хусус АМИТ «Ховар» бо истинод ба филиали «Инновейтив Роуд Солюшнз ЛТД» дар Ҷумҳурии Тоҷикистон хабар медиҳад.

Дар робита ба ҳолати тармафароӣ Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон ба таваҷҷуҳи шаҳрвандон ва меҳмонони мамлакат мерасонад, ки дар ин рӯзҳо ҳаракати худро бе зарурати фаврӣ дар роҳҳои кӯҳӣ маҳдуд намуда, аз корҳои кишоварзӣ, чаронидани чорво, ҷамъоварии ҳезум, шикор ва моҳидорӣ дар ин минтақаҳо худдорӣ намоянд.

Ҳамчунин ҳангоми истифодаи гармкунакҳо қоидаҳои бехатарии сӯхторро қатъиян риоя кунанд.

Кумита аз ронандагоне, ки ният доранд дар ин рӯзҳо тавассути ин хатсайрҳо сафар кунанд, дархост мекунад, ки дар навбати аввал дар бораи вазъи роҳ маълумоти пурра ва боэътимод гиранд.

Кумита ба хотири ҷилавгирӣ аз садамаҳо аз ронандагон  хоҳиш мекунад, ки бехатариро дар ҷойҳое, ки ҳаракати нақлиёт зиёд аст- дар наздикии мактабҳо, ағбаҳо, гардишҳо ва пастиҳо риоя намоянд. Ҳангоми ҳаракат  дар роҳҳои кӯҳӣ масофаи байни мошинҳоро назар ба ҳолати муқаррарӣ дарозтар нигоҳ доранд.

АКС аз манбаъҳои боз