Дар корхонаи нассоҷии «Ваҳдат-текстайл-Вахш» 400 нафар сокинон бо ҷои кор таъмин мешаванд

ДУШАНБЕ, 15.02.2023. /АМИТ «Ховар»/. Дар Ҷамоати деҳоти «20 — солагии Истиқлолияти Тоҷикистон»-и ноҳияи Вахш аз ҷониби соҳибкор Бароталӣ Юсупов корхонаи нассоҷии ҶДММ «Ваҳдат — текстайл — Вахш», ки аз ҷумла ҷўроб истеҳсол менамояд, бунёд мегардад. Корҳои насбкунии таҷҳизот дар корхонаи мазкур дар арафаи анҷомёбӣ қарор дошта, дар сурати ба пуррагӣ фаъол гардидани он 400 нафар сокинони маҳал бо ҷойи кор таъмин карда мешаванд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии вилояти Хатлон хабар медиҳад.

Корхонаи мазкур бо мақсади иҷрои ҳадафи чоруми стратегии Тоҷикистон — саноатикунонии босуръати мамлакат бунёд гардида, бо арзиши умумии 12 миллион доллар сохта шудааст.

Ин маҷмаа аз 0,58 гектар иборат буда, замини зери сохтмон 2000 метри мураббаъро ташкил медиҳад. Дар корхона тамоми роҳравҳо бо сафолак ва бетон пӯшонида шуда, атрофи он дар масоҳати 500 метри мураббаъ сабзкорӣ гардидааст.

Дар корхона таҷҳизоти навтарини технологӣ насб гардида, роҳбарияти он масъалаи зиёд намудани номгӯй ва миқдори маҳсулоти воридотивазкунандаро дар мадди аввал гузоштаанд.

Ёдовар мешавем, ки иҷрокунандаи Раиси вилояти Хатлон Давлаталӣ Саид зимни сафари корӣ ба ноҳияи Вахш дар корхонаи «Ваҳдат — текстайл — Вахш» соҳибкорро барои истеҳсоли маҳсулоти хушсифати ватанӣ вазифадор намуд.

АКС: Мақомоти иҷроияи ҳокимияти давлатии вилояти Хатлон