Дар соли таҳсили 2021-2022 беш аз 970 нафар хонандагони мактабҳои вилояти Суғд дар олимпиадаҳои фаннии сатҳи байналмилалӣ ғолиб гардиданд

ДУШАНБЕ, 14.02.2023 /АМИТ «Ховар»/. Дар соли таҳсили 2021-2022 4  ҳазору 945 нафар хонандагони муассисаҳои таълимии вилояти Суғд дар олимпиадаҳои фаннии сатҳи байналмилалӣ, ки дар Туркия, Қазоқистон, Озарбойҷон, Британияи Кабир, Италия, Чин, Олмон ва Русия баргузор шуданд, иштирок намуда, аз ин шумора 972 нафар ғолиб гардиданд. Дар ин хусус ба хабарнигори АМИТ «Ховар» дар Раёсати маорифи вилояти Суғд иттилоъ доданд.

Тазаккур дода шуд, ки дар даври ниҳоии олимпиадаи ҷумҳуриявии фаннӣ барои хонандагони синфи 11, олимпиадаи даставӣ (синфҳои 9-10), олимпиадаи фаннӣ барои наврасон (синфҳои 7-8 ва 5-6) 1 ҳазору 372 нафар хонандагон аз муассисаҳои таълимии шаҳру ноҳияҳои вилоят иштирок намуда, 672 нафар ба гирифтани ҷойҳои ифтихорӣ мушарраф шуданд. Дар олимпиадаҳои мазкур хонандагони муассисаҳои таълимии шаҳру ноҳияҳои Бобоҷон Ғафуров — 136, Исфара — 127, Хуҷанд — 116, Конибодом — 54, Спитамен — 52, Ҷаббор Расулов — 35 нафар соҳиби ҷойҳои намоён гардиданд.

Ба таъкиди масъулини соҳа, соли таҳсили 2022-2023 дар Маркази дарёфт ва рушди истеъдодҳои назди Раёсати маорифи вилоят 11 маҳфил аз фанҳои математика, химия, физика ва биология амал карда, ба онҳо 132 нафар хонандагони болаёқат аз шаҳру ноҳияҳои Хуҷанд, Бобоҷон Ғафуров, Истаравшан, Бӯстон ва Ҷаббор Расулов ба таври ройгон ҷалб гардидаанд.

Дар маҷмӯъ дар Маркази дарёфт ва рушди истеъдодҳои назди раёсат ва шуъбаҳои маорифи шаҳру ноҳияҳои вилояти Суғд 161 маҳфили фаннӣ бо фарогирии 1 ҳазору 954 нафар хонандагони болаёқат фаъолият дорад.

АКС аз бойгонӣ