Каналҳои Венетсия хушк мешаванд. Ба Италия хушксолии нав таҳдид мекунад

ДУШАНБЕ, 25.02.2023 /АМИТ «Ховар»/. Зимистони хушки Италия нигарониҳоро ба бор меорад, ки кишвар метавонад дубора ба хушксолӣ дучор гардад, зеро тибқи маълумоти олимон ва гурӯҳҳои экологӣ, дар кӯҳҳои Алп бориш аз меъёр камтар шудааст. Соли гузашта мамлакат бадтарин хушксолиро дар 70 соли охир аз сар гузаронид, иттилоъ медиҳад АБИ «Казинформ» бо истинод ба the Guardian.

Дар шаҳри Венетсия, ки дар он ҷо обхезӣ маъмулан мушкили асосӣ ба ҳисоб меравад, ба камшавии ғайриодии об дучор гаштаанд, ки боиси хушк шудани баъзе каналҳо шудааст. Саёҳат бо қаиқҳо (гондолҳо) ва нақлиёти обӣ душвор гардидааст.

Сабабҳои асосии пайдо шудани хушкӣ кам будани борон, фишори баланди атмосферӣ, равандҳои пуррагии моҳ ва баҳр мебошанд.

Моҳи июли соли гузашта Италия ба хушксолии шадид дар 70 соли охир дучор гардида, дар минтақаҳои атрофи дарёи По, ки истеҳсоли тақрибан сеяки маҳсулоти кишоварзии давлат ба онҳо рост меояд, вазъияти фавқулода эълон кард.

Азиза ДАДАБОЕВА,
АМИТ «Ховар»

АКС: Manuel Silvestri / Reuters