Маркази миллии тестӣ барои кормандони муваққатии нуқтаҳои бақайдгирӣ машғулияти омӯзишӣ оғоз намуд

ДУШАНБЕ, 08.02.2023 /АМИТ «Ховар»/. Шурӯъ аз 6 феврал Маркази миллии тестии назди Президенти Ҷумҳурии Тоҷикистон барои кормандони муваққатии нуқтаҳои бақайдгирӣ машғулияти омӯзишӣ оғоз намуд. Мақсад аз ин машғулият- омода кардани кормандони муваққатӣ дар нуқтаҳои бақайдгирист, ки ҳамчун роҳбар, ёвари роҳбар, бақайдгирандагон дар ин нуқтаҳо кор мекунанд. Дар ин хусус ба АМИТ «Ховар» дар Маркази миллии тестии назди Президенти Ҷумҳурии Тоҷикистон хабар доданд.

Дар сатҳи зарурӣ ба роҳ мондани раванди бақайдгирии довталабон барои иштирок дар Имтиҳонҳои марказонидаи дохилшавӣ (ИМД) ба муассисаҳои таълимии таҳсилоти миёна ва олии касбии Ҷумҳурии Тоҷикистон аз фаъолияти кормандони мазкур вобаста аст.

Мувофиқи нақша, барои ИМД-2023 дар 44 шаҳру ноҳияи ҷумҳурӣ 49 нуқтаи бақайдгирии доимамалкунанда бо теъдоди 152 истгоҳи корӣ ва дар 15 шаҳру ноҳияи дигар нуқтаҳои сайёри бақайдгирӣ таъсис дода мешаванд.

Тибқи эълон, аз тариқи электронӣ 513 нафар хоҳишманд бо мақсади иштирок дар озмун барои интихоби кормандони муваққатии нуқтаҳои бақайдгирӣ ариза (бо ҳуҷҷатҳои дигари зарурӣ) пешниҳод намуданд. Аз ин шумора мувофиқи таҳлилу баррасии ҳуҷҷатҳои пешниҳодкарда 420 нафар шахси аризадода ба машғулияти омӯзишӣ ҷалб карда мешаванд.

Барои ташкилу баргузории машғулияти омӯзишӣ дар шаҳру ноҳияҳои Душанбе, Хуҷанд, Бохтар, Кӯлоб, Хоруғ, Панҷакент ва Рашт аз ҷумлаи кормандони Марказ гурӯҳҳои корӣ таъсис дода шудаанд. Тибқи барнома, машғулияти омӯзишӣ барои 15 гурӯҳ дар шаҳру ноҳияҳои зикршуда то 18 феврал давом меёбад.

Дар асоси озмун шахсони дорои донишу маҳорати арзанда барои фаъолият дар нуқтаҳои бақайдгирӣ интихоб карда мешаванд, ки шумораашон 220 нафарро ташкил медиҳад.

Марҳалаи асосии бақайдгирии довталабон аз 1 март то 30 апрели соли 2023 давом меёбад.

АКС: Маркази миллии тестии назди Президенти Ҷумҳурии Тоҷикистон