НИШАСТИ МАТБУОТӢ. Соли 2022 дар Тоҷикистон бемориҳои сироятии ниҳоят хавфнок ба қайд гирифта нашуданд

ДУШАНБЕ, 10.02.2023 /АМИТ «Ховар»/. Тибқи омӯзиши вазъи эпидемиологии бемориҳои сироятӣ дар Тоҷикистон давоми соли 2022 бемориҳои домана, вараҷаи маҳаллӣ, фалаҷ, зуком ва сироятҳои ниҳоят хавфнок, ба монанди вабо ва тоун ба қайд гирифта нашуданд. Дар ин хусус имрӯз зимни нишасти матбуотӣ Вазири тандурустӣ ва ҳифзи иҷтимоии аҳолии Ҷумҳурии Тоҷикистон Ҷамолиддин Абдуллозода ба хабарнигорон иттилоъ дод.

Дар соли сипаригардида 257 ҳолати бемориҳои шадиди рӯда, 39 ҳолати гепатити вирусии намуди «В», 5 ҳолати гепатити вирусии намуди «С», 26 955 ҳолати бемориҳои шадиди роҳҳои нафас, 6694 ҳолати илтиҳоби шуш, 1157 ҳолати осеббинӣ аз газидани ҳайвонҳо ва 132 ҳолати бемории сил ба қайд гирифта шуд. Инчунин дар давраи ҳисоботӣ дар миқёси ҷумҳурӣ ҳамагӣ 24 ҳодисаҳои заҳролудшавӣ аз маҳсулоти ғизоӣ, аз ҷумла ботулизм ба қайд гирифта шуда, 82 нафар зарар дида, 7 нафар фавтиданд.

Ҳамчунин иттилоъ дода шуд, ки соли сипаригардида бо мақсади ба иммунизатсия фаро гирифтани кӯдакон ба ҷумҳурӣ 10 намуди ваксина дар ҳаҷми 3 миллиону 691 ҳазору 850 воя барои пешгирии 12 намуди бемориҳои сироятии бо ваксина идорашаванда ворид карда шуд.

«Барои пешгирии сирояти Covid-19 10 миллиону 12 ҳазору 360 воя ваксинаҳои Модерна, Файзер, АстраЗенека ва КоронаВак ворид карда шуданд. Инчунин бо мақсади гузаронидани иммунизатсия бар зидди бемории зукоми мавсимӣ байни кормандони соҳаи тибби шаҳру ноҳияҳои ҷумҳурӣ 33 000 воя ваксина ворид карда шуд», -иттилоъ дода шуд дар нишасти матбуотӣ.

Тибқи маълумоти омори расмӣ, сатҳи фарогирии кӯдакони навзод бо ваксинаҳои тавсияшуда 98,2 фоиз, кӯдакони то 1-сола 87,2 фоиз ва фарогирӣ бо вояи дуюми ваксинаи ИПВ-2 (аз моҳи июли соли 2022 оғоз ёфтааст), 27,7 фоизро ташкил медиҳад. Раванди иммунизатсия бо истифодаи зидди пневмоккокӣ тибқи нақша аз 1 ноябри соли 2022 оғоз ёфта, ҳоло идома дорад. Ба он кӯдакони то 6-сола мутобиқ ба тақвими миллӣ ва ҳадафҳои он фаро гирифта шуда истодаанд.

Фирӯза ДАВЛАТЗОДА,
АМИТ «Ховар»

АКС: АМИТ «Ховар»